ეკონომიკა

,,გირჩი’’ ბიუროკრატიის წინააღმდეგ ახალ კამპანიას იწყებს

,,გირჩის’’ დამფუძნებელი ზურაბ ჯაფარიძე მთავრობის ეკონომიკურ პოლიტიკას აკრიტიკებს და ახალ კამპანიას იწყებს სახელწოდებით ,,დააშრე ჭაობი.’’

როგორც ჯაფარიძემ დღევანდელ ბრიფინგზე განაცხადა, კრიზისიდან გამოსვლისთვის მთავრობას ბიუროკრატიული ხარჯები უნდა შეემცირებინა, თუმცა ამის ნაცვლად, აქციზის გადასახადი გაზარდა.

,,პირველ რიგში, რა ნაბიჯიც უნდა გადაედგა ხელისუფლებას, ეს უნდა ყოფილიყო ბიუროკრატიის და ბიუროკრატიული ხარჯების შემცირება. ეს არის ერთადერთი გზა, რომ ქვეყნის ეკონომიკა დაიძრას და დაადგეს სწრაფი განვითარების გზას. ნაცვლად ამისა, ჩვენ ვნახეთ, რომ ხელისუფლებამ გადაწყვიტა წასულიყო საპირისპირო მიმართულებით და გაეზარდა აქციზზე ფასები. შესაბამისად, ფასებმა მოიმატა ისეთ პროდუქტებზე, როგორიც არის თამბაქო, ალკოჰოლი, ასევე ტრანსპორტი იმიტომ, რომ საწვავზე გაზარდა ფასები. ხელისუფლება გვეუბნება: ბიუროკრატია არის იმდენად მნიშვნელოვანი, რომ ნაცვლად შემცირებისა, მას სჭირდება პირიქით უფრო მეტი ფულის ამოღება გადასახადების გაზრდით, რომ დააფინანსოს ეს ბიუროკრატიული ხარჯები.

ჩვენ, ,,გირჩს’’ არ გვჯერა, რომ საქართველოს სჭირდება ამხელა ბიუროკრატია და ამდენი ადამიანი, რომელიც შემოსავალს ღებულობს სახელმწიფო ბიუჯეტიდან, ამიტომ, ჩვენ ვიწყებთ კამპანიას სახელწოდებით ,,დააშრე ჭაობი.’’ ეს კამპანია მდგომარეობს შემდეგში: ჩვენ პერიოდულად ჟურნალისტებთან ერთად ავარჩევთ სხვადასხვა სტრუქტურას, რომელიც ფინანსდება სახელმწიფო ბიუჯეტიდან და შემდეგ მივმართავთ თხოვნით ხელისუფლებას, რომ ამ სტრუქტურებიდან აარჩიოს ერთი თანამშრომელი და ჩვენ მოგვეცეს საშუალება, დავაკვირდეთ ამ ერთი თანამშრომლის ერთ სამუშაო დღეს, გადავუღოთ ეს ერთი სამუშაო დღე და ვაჩვენოთ მოსახლეობას, როგორ მუშაობს ბიუროკრატია. ამ კამპანიის მიზანია, მოქალაქეებს დავანახოთ, რაში იხდიან ისინი გადასახადებს, რატომ უწევთ გაზრდილი გადასახადების გადახდა და რა არის მიზეზი იმისა, რომ ქვეყნის ეკონომიკა არის გაჩერებული’’, - განაცხადა ზურაბ ჯაფარიძემ.

ნინო ექვთიმიშვილი.