პოლიტიკა
გონიოს მიწებთან დაკავშირებით ბათუმის მერიასთან აქცია გაიმართა
ბათუმის მერიასთან გონიოს მაცხოვრებლებმა საპროტესტო აქცია გამართეს. შეკრებილებმა მოითხოვეს, რომ მიწის აღიარების კომისიამ ბათუმის საქალაქო სასამართლოს 6 ივნისის გადაწყვეტილება არ გაასაჩივროს.
აქციის მონაწილეებმა ბათუმის მერთან შეხვედრა მოითხოვეს.
აჭარის ტელევიზიის ინფორმაციით, საქმე ეხება მიწის აღიარების კომისიის 2016 წლის 27 ივნისის და 15 სექტემბრის გადაწყვეტილებებს, რომლის მიხედვით, 55 ოჯახს მიწის საკუთრების აღიარების უფლება აღარ ჰქონდა. მოსამართლე ლაშა თავართქილაძემ კი ეს გადაწყვეტილება ბათილად ცნო, რის გამოც კომისიამ ეს საკითხი ხელახლა უნდა შეისწავლოს, ხოლო დავის წაგებისთვის ადმინისტრაციულ ორგანოს 4 ათას 600 ლარის გადახდაც დაეკისრა.
გონიოს მიწები ყოფილმა პრეზიდენტმა მიხეილ სააკაშვილმა 271 ოჯახს საკუთრებაში გადასცა. დაკანონებული ნაკვეთები, სამი წლის შემდეგ უკანვე ჩამოართვეს.