საზოგადოება

გონივრულ ვადასთან დაკავშირებით უცხოელ პარტნიორებს უნდა გავესაუბროთ - „სითი ინსტიტუტის“ წარმომადგენელი

თბილისის მიწათსარგებლობის გენერალურ გეგმაზე მომუშავე კომპანია „სითი ინსტიტუტის“ წარმომადგენლის, მერაბ ბოლქვაძის განცხადებით, მათ კანონმდებლობით ნაკისრი ყველა ვალდებულება შეასრულეს, თუმცა მზად არიან, მერიასთან ითანამშრომლონ დოკუმენტის დასახვეწად.

რაც შეეხება თბილისის მერის მიერ დოკუმენტის სრულყოფისთვის მიცემულ გონივრულ ვადას, ბოლქვაძემ განაცხადა, რომ კომპანიამ უცხოელ პარტნიორებს უნდა გაესაუბროს. მისი ვარაუდით, „სითი ინსტიტუტს“ ერთი თვე დასჭირდება.

„ჩვენ ვფიქრობთ, რომ მიწათსარგებლობის გეგმას კანონმდებლობით რაც მოეთხოვება, ყველა ის მასალაა წარდგენილი კვალიფიციურად და ყველა ზონის სახეობებზე არის განმარტება. არქიტექტურის სამსახურს შეუძლია, ეს დოკუმენტი მოიხმაროს, ეს ხაზგასმით მინდა, აღვნიშნო.

რაკიღა მერიას აქვს კიდევ სურვილები, დარგობრივი მიმართულებით შეივსოს, ჩვენ მზად ვართ თანამშრომლობისთვის. თუ არის ისეტი საკითხი, რომელიც, შესაძლებელია უფრო სრულყოფილი გახდეს, ამასთან დაკავშირებით შესაბამისად მივაწვდით მერიას.

ვადებთან დაკავშირებით უცხოელ პარტნიორებს გავესაუბრებით დღის განმავლობაში და მათთან ერთად დავაზუსტებთ. სავარაუდოდ, ერთი თვისა იქნება“, -განუცხადა ბოლქვაძემ ჟურნალისტებს.

დედაქალაქის მერმა კახა კალაძემ დღევანდელ ბრიფინგზე აღნიშნა, რომ უარი განაცხადა „სითი ინსტიტუტის“ მიერ შემუშავებულ მიწათსარგებლობის გენგეგმაზე, თუმცა დოკუმენტის დასახვეწად გონივრული ვადა მისცა.

საბოლოო ვადა „სითი ინსტიტუტმა“ დღის ბოლომდე უნდა დააზუსტოს.

ანა მებურიშვილი