პოლიტიკა
გვაქვს უნიკალური შანსი ჩამოვაყალიბოთ ისეთი კონსტიტუცია, რომელიც უზრუნველყოფს ქვეყნის გრძელვადიან დემოკრატიულ განვითარებას - ირაკლი კობახიძე
სახელმწიფო საკონსტიტუციო კომისიის თავმჯდომარის, ირაკლი კობახიძის განცხადებით, კომისიის წევრებს აქვთ უნიკალური ისტორიული შანსი ჩამოაყალიბონ ისეთი კონსტიტუცია, რომელიც უზრუნველყოფს ქვეყნის გრძელვადიან დემოკრატიულ განვითარებას.
ამის შესახებ კობახიძემ, სახელმწიფო საკონსტიტუციო კომისიის პირველი სხდომის გასნის დროს განაცხადა.
„ჩვენ ვიცით, როგორი მემკვიდრეობა მივიღეთ 2012 წელს. კონსტიტუცია 2010 წელს განახლდა. არსებითი ცვლილებები შევიდა, რაზეც ვენეციის კომისიის მიერ დასკვნა იყო ცალსახად ნეგატიური, იყო მთელი რიგი შენიშვნები, რომელიც მაშინ პარლამენტმა არ გაითვალისწინა და კონსტიტუციაში არის ხარვეზები, რაც ეხება ხელისუფლების განაწილების პრინციპს, ურთიერთკონტროლისა და ურიერთდაბალანსების თვალსაზრისით. ეს პრინციპები არის დარღვეული კონსტიტუციის მოქმედ რედაქციაში, რაზეც ხაზგასმით საუბრობდა ვენეციის კომისია. ამიტომ, ჩვენ გვაქვს დღეს უნიკალური შანსი, ისტორიული შანსი, რომ ერთხელ და სამუდამოდ ჩამოვაყალიბოთ ისეთი დოკუმენტი, ისეთი კონსტიტუცია, ქვეყნის ძირითადი კანონი, რომელიც ერთი მხრივ, იქნება სრულ შესაბამისობაში კონსტიტუციური სამართლის ფუნდამენტურ პრინციპებთან და მეორე მხრივ, უზრუნველყოფს ქვეყნის გრძელვადიან დემოკრატიულ განვითარებას “, - განაცხადა კობახიძემ.
მონიკა დავლიანიძე