არქივი
სამართალი
იბერია ტვ-ს საქმის სასამართლო სხდომა კვლავ გადაიდო
თბილისის საქალაქო სასამართლოში ტელეკომპანია “იბერია”-ს სამაუწყებლო ლიცენზიის იძულებით დათმობის საქმეზე დღეისთვის ჩანიშნული სხდომა კვლავ გადაიდო.
ამის მიზეზი დაცვის მხარის შუამდგომლობა გახდა.
კერძოდ, ბრალდებულ ზურაბ ადეიშვილის ადვოკატმა, შოთა კახიძემ სასამართლოს წინაშე დააყენა შუამდგომლობა, რომ დაცვის მხარის მტკიცებულებებს დაერთოს რუსთავი 2-ის გადაცემაში ,,კვირის აქცეტები“ 30 სექტემბერს გასული ზაზა ოქუაშვილის ინტერვიუ, სადაც ადვოკატის განმარტებით, ,,ომეგა ჯგუფის“ დამფუძნებელი ,,იბერიასთან“ დაკავშირებით 2004 წელს მომხდარ მოვლენებში ირაკლი ოქრუაშვილის და ქიბარ ხალვაშის ,,ცუდ როლზე“ საუბრობს.
აღნიშნული შუამდგომლობის პასუხად, ბრალდების მხარემ გონივრული ვადა ითხოვა მასალის გასაცნობად, რათა გადაწყვიტოს იზიარებს თუ არა დაცვის მხარის შუამდგომლობას.
მხარეთა პოზიციების მოსმენის შემდეგ, მოსამართლემ სხდომის გადადების გადაწყვეტილება მიიღო.
,,რაც შეეხება დღევანდელ პროცესზე დაცვის მხარის მიერ დაყენებულ ახალ მტკიცებულებას, რომლის სისხლის სამართლის საქმეზე დართვასა და გამოკვლევასაც ითხოვს, ვინაიდან აღნიშნულ საკითხთან დაკავშირებით დღეს გახდა ჩემთვის ცნობილი და დღეს გადმომეცა დისკი, აუცილებლად გავეცნობი მასალებს. ამის შემდეგ დავაფიქსირებ ჩემს პოზიციას.
აქვე, მინდა აღვნიშნო, რომ ზაზა ოქუაშვილი დაიკითხა როგორც გამოძიების პროცესში, ასევე დაიკითხა უშუალოდ სასამართლო პროცესზე. მან მისცა ამომწურავი ინფორმაცია და სწორედ მისი და სხვა კიდევ ბევრი რელევანტური ჩვენება გახდა აღნიშნული პირების (ზურაბ ადეიშვილი, გიორგი ლაცაბიძე) პასუხისგებაში მიცემის საფუძველი“, - ამბობს პროკურორი თინათინ მახარაძე.
რაც შეეხება კითხვას, შესაძლოა, თუ არა საქმეში ახალი მტკიცებულების დართვით გამოიკვეთოს ირაკლი ოქრუაშვილის და ქიბარ ხალვაშის ბრალეულობაც, პროკურორი ამბობს, რომ მასალის გამოკვლევამდე ამაზე საუბარი, ნაადრევია.
,,იქიდან გამომდინარე, რომ ჯერ არ ყოფილა ამ მასალების განხილვა, მე ვერ მოგახსენებთ, რისი საფუძველი შეიძლება გახდეს აღნიშნულ დისკზე დატანილი ინფორმაცია. თუ იქნება სხვა დანაშაულის ნიშნებიც, რა თქმა უნდა, იქნება სათანდო რეაგირება“, - აცხადებს თინათინ მახარაძე.
შეგახსენებთ, რომ პროკურატურამ ტელეკომპანია ,,იბერიის’’ დახურვისა და სამაუწყებლო ლიცენზიის ჩამორთმევის საქმე 2016 წლის თებერვალში გახსნა. უწყების ინფორმაციით, აღნიშნულ ფაქტთან დაკავშირებით ყოფილი გენერალური პროკურორი ზურაბ ადეიშვილი და მისი პირველი მოადგილე გიორგი ლაცაბიძე სისხლის სამართლის პასუხისგებაში მიეცა.
საქმეზე მომდევნო სხდომა 22 ოქტომბრის 17:45 საათისთვის ჩაინიშნა.