ეკონომიკა

IFC-ის ევროპისა და ცენტრალური აზიის რეგიონში ახალი დირექტორი ჰყავს

საერთაშორისო საფინანსო კორპორაციას (IFC), რომელიც მსოფლიო ბანკის ჯგუფის წევრია, ევროპისა და ცენტრალური აზიის რეგიონში ახალი დირექტორი ჰყავს. ეს რეგიონი მოიცავს 28 ქვეყანას, რომელშიც IFC-ის საინვესტიციო პორტფელის მოცულობა 10 მლრდ. აშშ დოლარია, ხოლო საკონსულტაციო პროექტების რაოდენობა 89-ს შეადგენს.

ვიბკე შლომერმა ტომაშ ტელმა 1 მაისს შეცვალა. შლომერი ვენაში იმუშავებს და უხელმძღვანელებს რეგიონს, რომელიც აერთიანებს თურქეთს, უკრაინას, საქართველოს, სერბეთს, ყაზახეთს, პოლონეთს, რუსეთს და სხვა ქვეყნებს. მისი მართვის ქვეშ იქნება 420 პროფესიონალისგან შემდგარი გუნდი, რომელიც ყოველწლიურად დაახლოებით 3 მლრდ. აშშ დოლარის ახალ ინვესტიციას ახორციელებს.

ვიბკე შლომერს ოც წელზე მეტი ხნის გამოცდილება აქვს პროექტების, კორპორაციული ფინანსების და კერძო კაპიტალის მართვის სფეროში ისეთ დარგებში როგორებიცაა: ენერგეტიკა, ტრანსპორტი, კომუნალური მომსახურება, ტელეკომი და ტექნოლოგიები. დანიშვნამდე ის ხელმძღვანელობდა ინფრასტრუქტურის სექტორში ინვესტიციებს აღმოსავლეთ ევროპის, ახლო აღმოსავლეთისა და ჩრდილოეთ აფრიკის რეგიონში, რაც დაახლოებით 5.5. მლრდ აშშ დოლარის ინვესტიციებს მოიცავდა.

როგორც ვიბკე შლომერმა აღნიშნა: „ეს ის რეგიონია, სადაც კერძო კომპანიების და რეგიონული ეკონომიკური ზრდის ხელშესაწყობად ბევრი ახალი პროდუქტი და ინიციატივა დაინერგა, მათ შორის ენერგეტიკის და რესურსების ეფექტიანობის საკონსულტაციო პროგრამა, მწვანე ობლიგაციები, IFC-ის პირველი კლიმატური ადაპტაციის პროექტი და IFC-ის ქალაქების ინიციატივა. მიუხედავად მნიშვნელოვანი შედეგებისა, კვლავაც ბევრი გამოწვევა არსებობს. IFC-ის როლს რეგიონში ვხედავ იმაში, რომ ხელი შევუწყოთ კერძო სექტორის როლის გაძლიერებას ქვეყნებისთვის ყველაზე აქტუალური საკითხების გადაწყვეტაში, როგორიცაა მაგალითად ინფრასტრუქტურის გაუმჯობესება, აგრობიზნესის ეფექტიანობის ზრდა, კლიმატზე ორიენტირებული ინოვაციებისა და მრეწველობის ხელშეწყობა, ასევე ადგილობრივი კაპიტალის ბაზრების გაძლიერება.“

ვიბკე შლომერმა IFC-ში მუშაობა 2004 წელს საინვესტიციო ოფიცრის თანამდებობაზე დაიწყო ტელეკომის, მედიის და ტექნოლოგიის ჯგუფში ვაშინგტონში. მისი მომდევნო რეგიონული გამოცდილება დაკავშირებულია ევროპის და ცენტრალური აზიის, ახლო აღმოსავლეთის, ჩრდილოეთ აფრიკის, აღმოსვლეთ აზიის და წყნარი ოკეანის რეგიონებთან.

IFC-ში მუშაობის დაწყებამდე შლომერი მოღვაწეობდა ევროპის საინვესტიციო ბანკში ლუქსემბურგში და გერმანიის საინვესტიციო კორპორაციაში (DEG), სადაც პასუხისმგებელი იყო სესხებზე ინფრასტრუქტურის სექტორში და კაპიტალში ინვესტირების საკითხებზე აფრიკის, აზიის და აღმოსავლეთ ევროპის ქვეყნებში.