საზოგადოება

იღებთ `ფსიქოს` სულ რაღაც 20-30 ლარად ისე, რომ არავინ არ ინტერესდება თქვენი ჯანმრთელობის მდგომარეობით - დავით მესხიშვილი

საქართველოს ტრანსპორტისა და გზების ასოციაციის პრეზიდენტი, დავით მესხიშვილის განცხადებით, ჯანმრთელობის ცნობის ე.წ. "ფსიქოს" კორუფციული გზით გაცემა ხშირად საავტომობილო გზებზე მომხდარი უბედური შემთხვევების მიზეზი ხდება.

აღნიშნულთან დაკავშირებით დავით მესხიშვილი სოციალური ქსელით ჯანდაცვის სამინისტროს მიმართავს.

"ფსიქო"(ზი) გზებზე!

ჯანმრთელობის ცნობის ე.წ. "ფსიქოს" გაცემა უკვე წლებია, რაც კორუფციულად ხდება. ერთი შეხედვით უმნიშვნელო დოკუმენტი, ხშირ შემთხვევაში საფუძველი ხდება სერიოზული პრობლემების. იღებთ "ფსიქოს" სულ რაღაც 20-30 ლარად ისე, რომ არავინ არ ინტერესდება თქვენი ჯანმრთელობის მდგომარეობით, იფორმებთ იარაღს, მართავთ საჭეს. არადა, შესაძლოა არც ერთი გეკუთვნით და არც მეორე. ჩვენს გზებზე აშკარად მძვინვარებს მძიმე ფორმის ფსიქოზი, არავინ არავის უთმობს გზას, გაბმული სიგნალი, მოუსვენრობა, საცობში გადასწრება ტროტუარის ხარჯზე, გინება, დაუმორჩილებლობა და ა.შ. ხშირად საჭესთან ხვდებიან ფსიქიკურად გაუწონასწორებელი ადამიანები, რაც ყველაზე უფრო საშიშია ასეთ ადამიანებს იარაღის ტარების უფლებაც აქვთ. ოფიციალური სტატისტიკა კიდევ უფრო საგანგაშო სურათს გვაძლევს: 2016 წელს გადაღლის, ჩაძინების ან/და ჯანმრთელობის მდგომარეობის გაუარესების გამო 121 ავტოსაგზაო შემთხვევა მოხდა, დაშავდა 218 და გარდაიცვალა 23 ადამიანი.

იმავე წელს, დაუდგენელი მიზეზით მოხდა 1173 შემთხვევა, დაშავდა 1417 და გარდაიცვალა 50 ადამიანი. უნდა ვივარაუდოთ, რომ დაუდგენელი მიზეზების უმეტესობა უკავშირდება ჯანმრთელობის მდგომარეობის უცაბედ გაუარესებას. მოვუწოდებ ჯანდაცვის სამინისტროს ან გაატარეთ რეფორმა ან საერთოდ შეწყვიტეთ "ფსიქოს" გაცემა კორუფციულად, ფულს მაინც ნუ ახდევინებთ ხალხს გაყალბებულ დანაშაულებრივ დოკუმენტში’’, - წერს მესხიშვილი ფეისბუქის პირად გვერდზე.