საზოგადოება
ილია მეორე დღეს რუსეთის პატრიარქს შეხვდება
სრულიად საქართველოს კათოლიკოს პატრიარქი ილია მეორე მოსკოვში იმყოფება, სადაც დღეს რუსეთის პატრიარქს შეხვდება.
საქართველოს საპატრიარქოს საგარეო საქმეთა განყოფილების თავმჯდომარის მოადგილის, მამა კახაბერ გოგოტიშვილის ინფორმაციით, უწმინდესი კირილე 70 წლის გახდა და ამ იუბილესთან დაკავშირებით მოსკოვში მიწვეული არიან მსოფლიო მართლმადიდებელი ეკლესიის მეთაურები.
20 ნოემბერს მაცხოვრის ტაძარში საერთო წირვა შესრულდება, რომელშიც სხვადასხვა მართლმადიდებელი ეკლესიის პატრიარქები და მათი წარმომადგენლები მიიღებენ მონაწილეობას. წირვის შემდეგ, რუსეთის პატრიარქი საზეიმო მიღებას გამართავს, რომელიც მისი დაბადების 70 წლის იუბილეს ეძღვნება.
ამასთან, დეკანოზი კახაბერ გოგოტიშვილი არ გამორიცხავს, რომ ვიზიტის ფარგლებში ილია მეორე რუს პოლიტიკოსებსაც შეხვდეს.
,,იქნება საზეიმო წირვა 20 ნოემბერს, 23 ნოემბერს, გიორგობას იქნება ქართული წირვა და იმავე დღეს საღამოს ქართულ დიასპორას შეხვდება უწმინდესი და დალოცავს იქ მცხოვრებ ქართველებს. მაგრამ იქ პოლიტიკოსებს შეხვდება თუ არ შეხვდება, ამის შესახებ პროგრამაში არ წერია, თუმცა კი, სავარაუდოდ ესეც იქნება’’, - აცხადებს დეკანოზი კახაბერი.
ნინო ექვთიმიშვილი