საზოგადოება

ილია მეორე ლიეტუვას მმართველი პარტიის თავმჯდომარეს შეხვდა

სრულიად საქართველოს კათოლიკოს-პატრიარქი ილია II ლიეტუვას სეიმის კულტურის კომიტეტისა და მმართველი პარტიის (,,მწვანეთა და ფერმერთა კავშირის“) თავმჯდომარეს რამუნას კარბაუსკისისა და საქართველოს საგანგებო და სრულუფლებიან ელჩს ლიეტუვაში ხათუნა სალუქვაძეს შეხვდა.

როგორც საქართველოს საპატრიარქოს ვებგვერდზე გამოქვეყნებულ ინფორმაციაშია ნათქვამი, სრულიად საქართველოს კათოლიკოს-პატრიარქმა ყურადღება გაამახვილა ოკუპირებულ ტერიტორიებზე და რამუნას კარბაუსკისს საქართველოს მხარდაჭერისთვის მადლობა გადაუხადა.

საპატრიარქოს ცნობით, შეხვედრაზე საუბარი ასევე შეეხო საქართველოსა და ლიეტუვას შორის არსებულ მეგობრულ ურთიერთობებს და იმ პრობლემებს, რომელთა წინაშეც ჩვენი ქვეყნები დგას.

„ქართველებისადმი განსაკუთრებული დამოკიდებულების გამო ჩვენ მივიღეთ გადაწყვეტილება, რომ ჩვენს ენაში დამკვიდრდეს თქვენი ქვეყნის ავთენტური სახელწოდება – საქართველო“, - განაცხადა კარბაუსკისმა.

საპატრიარქოს ინფორმაციით, საქართველოს საგანგებო და სრულუფლებიანმა ელჩმა ლიეტუვაში ხათუნა სალუქვაძემ ხაზი გაუსვა ქართველებისადმი ლიეტუველთა განსაკუთრებულ სიყვარულსა და პატივისცემას, რომელსაც საფუძველი პატრიარქმა კირიონ II-მ ჩაუყარა.

შეხვედრის დასასრულს მისმა უწმინდესობამ სტუმრებს ვიზიტისთვის მადლობა გადაუხადა, სამახსოვრო საჩუქრები გადასცა და წარმატებული მოღვაწეობა უსურვა.