საზოგადოება
ილიაუნის მოკლული პროფესორის მარიაკ წივწივაძის ოჯახის სასარგებლოდ შსს-ს ზიანის ანაზღაურება დაეკისრა
ილიაუნის პროფესორის, მარიკა წივწივაძის მკვლელობისთვის პასუხისმგებლობა სახელმწიფოს დაეკისრა.
თბილისის საქალაქო სასამართლოს გადაწყვეტილებით, წივწივაძის დედას, შინაგან საქმეთა სამინისტრო მორალურ ზიანს აუნაზღაურებს, ხოლო გარდაცვლილი ქალის შვილებს, სრულწლოვანებამდე ყოველთვიურ სარჩოს გადაუხდის.
ფაქტს ფეისბუქის პირად გვერდზე გამოეხმაურა უფლებადამცველი, ბაია პატარაია.
,,ძააააალიან მაგარი ამბავი!!!
შსს-ს სასამართლო მოვუგეთ ფემიციდის საქმეზე: მარიკა წივწივაძის (ილიუნის პროფესორი) მკვლელობისთვის პასუხისმგებლობა სახელმწიფოსაც დაეკისრა. შსს-მ რომელმაც იცოდა, თუ რა ძალადობას ექვემდებარებოდა მარიკა, მაგრამ არაფერი გააკეთა მის დასაცავად, გამტყუნებულია თბილისის საქალაქო სასამართლოს მიერ. შსს-ს დაეკისრა მორალური ზიანის ანაზღაურება დედისათვის და ყოველთვიური სარჩოს გადახდა დაობლებული შვილისათვის სრულწლოვანებამდე.
სტრასბურგშიც გვაქვს ეს საქმე და იქაც მოვიგებთ, რადგან მარიკა წივწივაძე სახელმწიფოს სისტემური ხარვეზების მსხვერპლია. სახელმწიფო, რომელიც ვერ იცავს ქალებს, პასუხს აგებს როგორც ადგილობრივი, ისე საერთაშორისო სასამართლოს წინაშე!“, - წერს ფეისბუქის პირად გვერდზე ბაია პატარაია.
ცნობისათვის, 2014 წლის 17 ოქტომბერს, ილიას სახელმწიფო უნივერსიტეტის ლექტორი, მარიკა წივწივაძე ყოფილმა მეუღლემ ლაშა მაღრაძემ უნივერსიტეტის შენობაში ცეცხლსასროლი იარაღით მოკლა, შემდეგ კი, თავი მოიკლა.