ეკონომიკა
იმედი გვაქვს, რომ საქართველო-რუსეთის ურთიერთობა საბჭოთა კავშირისდროინდელ ურთიერთობას დაუბრუნდება - რუსი ბიზნესმენი
თბილისში რუსეთისა და საქართველოს ბიზნესწრეების წარმომადგენლების შეხვედრა მიმდინარეობს.
საქართველოში ჩამოსული ბიზნესმენების 14-კაციანი დელეგაცია დაინტერესებულია სოფლის მეურნეობით, სატრანსპორტო, სამშენებლო და ჯანდაცვის სფეროებით.
რუსეთის ინოვაციური განვითარების ასოციაციის დირექტორის, მარინა შიჩკინას იმედი აქვს, რომ საქართველოსა და რუსეთს შორის დიპლომატიური ურთიერთობები აღდგება, რადგან ორ ქვეყანას სიყვარული და დიდი ხნის პარტნიორობა აკავშირებთ
„ოფიციალური ურთიერთობები ბიზნესის სრულფასოვანი კეთებისთვის, რა თქმა უნდა, არ გვყოფნის. დიდი იმედი გვაქვს, რომ ეს ურთიერთობები გაღრმავდება, გაგრძელდება და დაუბრუნდება, კარგი გაგებით, საბჭოთა კავშირისდროინდელ ურთიერთობას“,- აღნიშნა ბიზნესმენმა.
როგორც მედიასთან საუბარში რუსეთის „ტრანსინტერ ტექნოლოგის“ პრეზიდენტმა როდიონ ატლეტოვმა განაცხადა, მან კონკრეტული გეგმების შესახებ არაფერი იცის, თუმცა აღნიშნავს, რომ საქართველოში მომავალი პარტნიორების მოსაძებნად ჩამოვიდა.
„ასევე ურიგო არ იქნება კონტაქტების დამყარება ხელისუფლებასთან, რათა ქვეყანაში ბიზნესი დავიწყოთ. ჩვენი კონკრეტული მიმართულებაა ტაქსების ბიზნესი. რა თქმა უნდა, ჩვენი სურვილია ხელისუფლებასთან შეხვედრა და თანამშრომლობა. ეს ჩვენთვის საინტერესო იქნება, მაგრამ ჯერ ასეთი შეხვედრა მხოლოდ მიზანია, კონკრეტული პასუხი არ გვაქვს. არანაირი პოლიტიკა, ეს ბიზნესია, რომლის განვითარებაც გვაინტერესებს. ვციდლობთ ჩვენი საქმიანობა პოლიტიკის მიღმა დარჩეს. ფორუმზე გვესაუბრებიან იმის შესახებ, თუ როგორ ხდება საქართველოში ბიზნესის კეთება. ვფიქრობ, ეს შეხვედრა პოზიტიურია და ჩვენ მუშაობას გავაგრძელებთ“,-აღნიშნა ატლეტოვმა.
თბილისში საქართველო-რუსეთის ბიზნეს-ფორუმის გამართვა აბაშიძე-კარასინის ბოლო შეხვედრის დასრულების შემდეგ დაანონსდა.
მონიკა დავლიანიძე