კომენტარი
იმპორტიორების მხრიდან ფასების ზრდის შემთხვევაში მონეტარულ პოლიტიკას გავამკაცრებთ - არჩილ მესტვირიშვილი
ეროვნული ბანკის ვიცე-პრეზიდენტის, არჩილ მესტვირიშვილის განცხადებით, თუ იმპორტიორები ფასების ზრდას განახორციელებენ, ეროვნული ბანკი მათ მონეტარული პოლიტიკის გამკაცრებით უპასუხებს.
ამის შესახებ მესტივრიშვილმა ჟურნალისტებს მთავრობის კანცელარიაში განუცხადა.
რაც შეეხება ლარის მიმდინარე კურსს, მესტივირიშვილი განმარტავს, რომ ვალუტის გაუფასურება მათ შორის მოლოდინებს უკავშირდება.
მან მაგალითიც მოიყვანა და თქვა, რომ იმპორტიორები ადრე ვალუტას იანვარ-თებერვლის თვეში ყიდულობდნენ, წელს კი ამის გაკეთება აგვისტოს თვეში დაიწყეს.
„შემიძლია გითხრათ, რომ ფუნდამენტური ფაქტორი, არის პოზიტიური. ეს ქცევა მოლოდინების მხრიდან არის გამოწვეული. იმპორტიორები ვინც ადრე იანვარ-თებერვალში ყიდულობდა ვალუტას, მათ შესყიდვა ჯერ კიდევ აგვისტოდან დაიწყეს და ახლა ეს პროცესი უფრო გააქტიურებულია, რაც ასევე მოლოდინებთან არის დაკავშირებული“,-განაცხადა არჩილ მესტვირიშვილმა.
რაც შეეხება კითხვას, იმპორტიორების მხრიდან ფასების შესაძლო ზრდასთან დაკავშირებით, მესტვირიშვილი აცხადებს, რომ „მონეტარულ პოლიტიკას გაამკაცრებენ“.
„ამაზე ჩვენი რეაქცია იქნება მონეტარული პოლიტიკის გამკაცრება, თუ ვინმე ზედმეტად გაზრდის ფასს, მათ შორის იმპორტიორი. ადრეც გვინახია, რომ იმპორტიორებმა გააძვირეს და მას შემდეგ რაც მათი გაყიდვები შემცირდა, მოუწიათ ფასების ისევ შემცირება. ბუნებრივია, მომავალშიც ამ პროცესთან გვექნება საქმე“,-განმარტა ეროვნული ბანკის ვიცე-პრეზიდენტმა.
მონიკა დავლიანიძე