მსოფლიო
ინდოეთის დედაქალაქში ჰაერის დაბინძურების გამო სკოლები დაიხურა
ინდოეთის დედაქალაქი დელი შავმა მტვერმა დაფარა. ,,ბიბისის“ ცნობით, დელიში ჰაერის დაბინძურების ხარისხი დასაშვებ მაჩვენებელზე 15 პუნქტით მაღალია. ქალაქის ქუჩებში ხილვადობა ფაქტობრივად არ არის, რის გამოც, დედაქალაქის ხელისუფლებამ სამი დღით დახურა ყველა სკოლა, ხუთი დღით შეაჩერა მშებებლობები და მოსახლეობას მოუწოდა, ქუჩაში გასვლისგან თავი შეიკავონ. ამასთან, ჩამოწოლილი მტვერის გასაფანტად, დედაქალაქის მთავარ გზებზე ყოველდღიურად წყალს ასხამენ.
დელიში საპროტესტო გამოსვლები ეწყობა, ადგილობრივები ხელისუფლებას პრობლემის მოგვარებისკენ მოუწოდებენ.
დელიში შექმნილი პრობლემის გამო, დედაქალაქის მთავარმა მინისტრმა პირობა დადო, რომ ჰაერის დაბინძურებასთან საბრძოლველად რადიკალურ ზომებს მიმართავს, რაც გამოიხატება ბადლაპურის ელექტროსადგურის დახურვასა და ნაგავსაყრელებისთვის ცეცხლის წაკიდების აკრძალვაში.
ინტერნეტში დელის ქუჩების ამსახველ ფოტომასალასთან ერთად, ვრცელდება ქალაქ აგრაში გადაღებული ფოტოები, სადაც ერთ-ერთი ყველაზე პოპულარული ტურისტული ღირსშესანიშნაობა ტაჯ მაჰალი მდებარეობს - ბოლო დროინდელ ფოტოებში სასახლის დანახვა ფაქტობრივად შეუძლებელია.
სპეციალისტები ქალაქ დელის მტვრით დაფარვას გასულ კვირას ჩატარებულ ცეცხლის ფესტივალს უკავშირებენ, რომელზეც ტრადიციის მიხედვით, ორგანიზატორები და ფესტივალის მონაწილეები სამი დღის მანძილზე ცაში დიდი რაოდენობით ფეირვერკს უშვებენ.
მარი ნამგალაძე