პოლიტიკა

იოსებ სიგუას მიერ თანამდებობის დატოვებაზე გავრცელებული ინფორმაცია სიმართლეს არ შეესაბამება - ნათია მეზვრიშვილი

შინაგან საქმეთა მინისტრის მოადგილემ, ნათია მეზვრიშვილმა უარყო გავრცელებული ინფორმაცია თბილისის დეტექტივების სამმართველოს უფროსის, იოსებ სიგუას თანამდებობიდან წასვლის შესახებ.

მეზვრიშვილის თქმით, სიგუა ჯანმრთელობის გაუარესების გამო ვერ გამოცხადდა ხორავას ქუჩის საქმის შემსწავლელი დროებითი საპარლამენტო საგამოძიებო კომისიის გუშინდელ სხდომაზე.

„იოსებ სიგუას მიერ თანამდებობის დატოვებაზე გავრცელებული ინფორმაცია სიმართლეს არ შეესაბამება. იგი იმყოფებოდა შეუძლოდ, რამაც გარკვეული კითხვები გააჩინა საზოგადოებაში, რაც ჩემთვის გაუგებარია, რადგან პოლიციელებსაც აქვთ უფლება გახდნენ ავად. როგორც კი გამოჯანმრთელდება, ეს ადამიანი გამოცხადდება კომისიაზე. ის დაგეგმილად არ გახდა ცუდად და ვერ ჩააყენა პარლამენტი საქმის კურსში, როგორც კი ამის შესახებ ცნობილი გახდა კომისიას ინფორმაცია მივაწოდეთ. კომისიაში გამოცხადების და საქმესთან დაკავშირებით ინფორმაციის მიწოდების არანაირი პრობლემა სამინისტროს არც ერთ წარმომადგენელს არ აქვს“, –განაცხადა მეზვრიშვილმა.