პოლიტიკა
ირაკლი კობახიძემ სპეკულაცია უწოდა ინფორმაციას, რომ საქართველოს მთავრობა აშშ-ის ელჩად ბრიჯიტ ბრინკის კანდიდატურას ბლოკავს
საქართველოს პარლამენტის თავმჯდომარემ ირაკლი კობახიძემ სპეკულაცია უწოდა ინფორმაციას, თითქოს საქართველო აშშ-ის ელჩად ბრიჯიტ ბრინკის კანდიდატურას ბლოკავს.
კობახიძის შეფასებით, ქვეყანას მსგავსი განცხადებები აზიანებს.
პარლამენტის თავმჯდომარემ ყველას მოუწოდა, არ აყვნენ სპეკულაციებს და ეს საკითხი დღის წესრიგიდან მოხსნან.
„ეს არის სპეკულაციები, რომელიც გვესმის უკვე რამდენიმე კვირაა. ძალიან სამწუხაროა, როცა ასეთი სპეკულაციები ვრცელდება, რადგან ნებისმიერ შემთხვევაში, ეს როგორი ტყუილიც არ უნდა იყოს, ქვეყანას ასეთი განცხადებები აზიანებს.
რა თქმა უნდა, ურთიერთობებსაც, რომელიც არის ჩამოყალიბებული ჩვენს მთავარ სტრატეგიულ პარტნიორთან, აშშ-სთან. აქედან გამომდინარე, ჩემი რეკომენდაცია იქნება ყველას მიმართ, რომ არ აჰყვეთ ამ სპეკულაციებს და მოვხსნათ ეს საკითხი დღის წესრიგიდან, ეს არის სპეკულაციები, რომლებიც აზიანებს ურთიერთობებს“, – განაცხადა კობახიძემ.
გამოცემა Foreign Policy-ის ინფორმაციით, საქართველოს მთავრობამ აშშ-ის ელჩობის კანდიდატი, ბრიჯიტ ბრინქი დაბლოკა. გამოცემამ წყაროებზე დაყრდნობით დაწერა, რომ აშშ-ის მთავრობა საქართველოში აშშ-ის ელჩად სწორედ ბრინქს განიხილავდა, თუმცა საქართველოს მთავრობის რამდენიმე პირი მას მიიჩნევდა ექს-პრეზიდენტ მიხეილ სააკაშვილის მიმართ კეთილგანწყობილ ფიგურად.
გამოცემასთან რამდენიმე წყარომ გამოთქვა აზრი, რომ ამ წინააღმდეგობის უკან შესაძლოა, პარტია „ქართული ოცნების“ თავმდჯომარე ბიძინა ივანიშვილი იდგეს. Foreign Policy-მა ამ ინფორმაციის დამოუკიდებლად დადასტურება ვერ შეძლო.