საზოგადოება

ირაკლი მამალაძე საპატრიარქოსა და პროკურატურას სამი კითხვით მიმართავს

ჟურნალისტმა ირაკლი მამალაძემ საპატრიარქოსა და პროკურატურას სამი კითხვით მიმართა. ირაკლი მამალაძემ სთხოვა მათ, უპასუხონ, რატომ გაიქცა ქვეყნიდან პატრიარქის დაცვის ყოფილი უფროსი სოსო ოხანაშვილი, რა უნდოდა პედოფილიაში ბრალდებულ ტარას შავშიშვილს საპატრიარქოს დაცვაში და რატომ არ არის დღემდე გამოკვლეული მამა გიორგი მამალაძის საქმიანობა დონეცკის ოლქში, სადაც მისი თქმით, დეკანოზი მძიმე ხასიათის სექსუალურ დანაშაულში იყო შემჩნეული.

„რა თქმა უნდა, მეც მაქვს კითხვები, როგორც პროკურატურასთან ასევე საპატრიარქოსთან. კერძოდ, სამი კითხვა მაქვს: სად გაქრა უდანაშაულო სოსო ოხანაშვილი? რა უნდოდა ტარას შავშიშვილს საპატრიარქოს დაცვაში, ყველას გვახსოვს 53-ე სკოლის ინციდენტი, როგორ გამოაძევეს ეს ადამიანი. და მესამე: ამ შემთხვევაში მივმართავ საპატრიარქოს, რატომ არ არის დღემდე გამოკვლეული მამა გიორგის საქმიანობა დონეცკის ოლქში, სადაც ეწეოდა მღვდელმსახურებას, რომელსაც დაუწვეს მანქანა და რომელიც შემჩნეული იყო მძიმე ხასიათის სექსუალურ დანაშაულში. ამის შემდეგ მას მისცეს მეორე ჯვარი და დღეს ეს ადამიანი ამბობს, რომ ციანიდი მას სჭირდებოდა ადამიანების დასახმარებლად და კეთილი საქმისთვის. ამ კითხვებზე ვითხოვ პასუხს. მამა გიორგის კარიერული წინსვლა ამ ინციდენტის შემდეგ თავბრუდამხვევად მოხდა და ის უცბად გადმოიყვანეს თბილისში, მეორე ჯვარი მისცეს და ა.შ.“, -აღნიშნა ჟურნალისტმა დღევანდელ პრესკონფერენციაზე.

ირაკლი მამალაძის ინფორმაციით, აღნიშნული ინციდენტი დონეცკის ოლქში დაახლოებით 2008 წელს მოხდა. ჟურნალისტის თქმით, დეკანოზის დანაშაულის დამამტკიცებელი საბუთები აქვს უკრაინის საპატრიარქოს.

„დეკანოზი ავიწროებდა არასწრულწლოვანს, რომლის მამამაც დაწვა შემდეგ მისი ავტომობილი დონეცკში და ეს ცნობილი ფაქტია. ამის შესახებ საბუთები დევს იმ ეკლესიაში და აქვს უკრაინის საპატრიარქოს“, -განაცხადა ირაკლი მამალაძემ.

ირაკლი მამალაძის ვარაუდით, დასახელებულ სამივე პიროვნებას საპატრიარქოში საერთო მფარველი ჰყავს, თუმცა კონკრეტული გვარების დასახელებისგან მან თავი შეიკავა.

ჟურნალისტმა ასევე დასვა შეკითხვა, რატომ მუშაობდა დეკანოზი გიორგი მამალაძე ორ საკვანძო თანამდებობაზე, საპატრიარქოს ქონების მართვის სააგენტოში, ასევე საპატრიარქოს კუთვნილებაში არსებული კლინიკის ხელმძღვანელად.

მისი თქმით, ამ ფაქტების გამოძიების შემდგომ საზოგადოებას დეკანოზის პიროვნების შესახებ სრული სურათი შეექმნება. მამალაძემ აღნიშნა, რომ ის საპატრიარქოს გიორგი მამალაძის საქმიანობის შესწავლის მოთხოვნით ოფიციალურადაც მიმართავს.