საზოგადოება

ირაკლი შოთაძემ განმარტა, რატომ არ ჩავიდა პანკისში

საქართველოს მთავარმა პროკურორმა, ირაკლი შოთაძემ განმარტა, რატომ არ ჩავიდა პანკისში თემირლან მაჩალიკაშვილის საქმის გამოძიების ფარგლებში.

მთავარი პროკურორის თქმით, სამართლებრივად მას არ აქვს უფლება, გარეშე პირს, ოჯახის გარდა, მიაწოდოს ინფორმაცია გამოძიების შესახებ.

„მინდა განვმარტო, რომ არსად ჩასვლის პრობლემა არ არსებობს. მაგრამ აქ საუბარი იყო, რომ შეხვედრა უნდა მომხდარიყო კონკრეტულ სისხლის სამართლის საქმესთან, მიმდინარე გამოძიებასთან და საქმეში არსებულ მტკიცებულებებთან დაკავშირებით.

სამართლებრივად, საქართველოს სისხლის სამართლის კანონმდებლობის შესაბამისად, ვერცერთ გარეშე პირს სიახლის სამართლის საქმესთან დაკავშირებით გამოძიების მიმდინარეობის შესახებ ჩვენ ინფორმაციას ვერ მივაწოდებთ.

გამონაკლისი ამ შემთხვევაში ოჯახია, ვინაიდან მათ გამოძიების მიმდინარეობასთან დაკავშირებით ლეგიტიმური ინტერესი აქვთ.

სწორედ ეს იყო მიზეზი იმისა, რომ პანკისის ხეობაში არ ჩავედი, უხუცესებს არ შევხვდი და ვერც შევხვდებოდი იმიტომ, რომ მსგავსი ფორმატის შეხვედრაში მე სამართლებრივად მონაწილეობას ვერ მივიღებ და ვერცერთი პროკურორი ვერ მიიღებს მსგავს ფორმატში მონაწილეობას“, -აღნიშნა შოთაძემ.

პანკისის ხეობის სოფელ დუისში 26 დეკემბრის სპეცოპერაციის შედეგად დაღუპული თემირლან მაჩალიკაშვილის საქმის გამო პანკისის უხუცესებმა მოითხოვეს მთავარი პროკურორის ჩასვლა და მათთან დალაპარაკება გამოძიების შესახებ.