საზოგადოება
ირაკლი შოთაძესთან შეხვედრის შემდეგ 45 დღე გავიდა და არავინ შემხმიანებია - თემირლან მაჩალიკაშვილის მამა
პანკისის ხეობაში არასამთავრობო ორგანიზაცია „ადამიანის უფლებების სწავლებისა და მონიტორინგის ცენტრი“ თემირლან მაჩალიკაშვილის სიცოცხლის ხელყოფის საქმეზე მიმდინარე გამოძიებასთან დაკავშირებით შეხვედრას მართავს. მას ადგილობრივები, უხუცესები და თემირლან მაჩალიკაშვილის ოჯახის წევრები ესწრებიან.
თემირლან მაჩალიკაშვილის მამის, მალხაზ მაჩალიკაშვილის განცხადებით, მთავარ პროკურორთან შეხვედრის შემდეგ 45 დღე გავიდა, თუმცა არავინ არ შეხმიანებია.
„არ აღიარებენ, რომ შეცდომა მოუვიდათ და საქმეს წელავენ. ირაკლი შოთაძე შეხვედრისას დამპირდა, რომ ერთ კვირაში საქმეში არსებულ მტკიცებულებებს გამაცნობდა და მეცოდნებოდა, რა მტკიცებულებებით ხელმძღვანელობენ, თუმცა 45 დღე გავიდა და არავინ შემხმიანებია. პრინციპში, აღარც ნდობა მაქვს და აღარც რაიმეს მოლოდინი. თემირლანი არის დაზარალებული, სპეცრაზმელებს მისამართი შეეშალათ. არ ვაპირებ გაჩერებას, სამართლებრივი გზით სიმართლეს მაინც დავადგენ“, -თქვა მალხაზ მაჩალიკაშვილმა შეხვედრის დაწყებამდე.
თემირლან მაჩალიკაშვილის 26 დეკემბერს პანკისის ხეობის სოფელ დუისში სუს-ის მიერ ჩატარებული სპეცოპერაციის დროს თავის არეში დაჭრეს. ის სამკურნალოდ თბილისში გადაიყვანეს, თუმცა 10 იანვარს ის გარდაიცვალა.