პოლიტიკა
ფინანსთა სამინისტროს მიერ წარმოდგენილი ბიუჯეტი არის არაადეკვატურობის მწვერვალი - ალეკო ელისაშვილი
ნუთუ ვერ ხედავენ, რა ხდება ჩვენ გარშემო? ყველგან ომია, ყველა ჩვენი მეზობელი იბრძვის. ასეთ დროს თავდაცვასა და უსაფრთხოებაზე ფულის დახარჯვა რომ არ გვინდა, ეს რას ნიშნავს? ალეკო ელისაშვილი ჟურნალისტების კითხვას კითხვით პასუხობს.
საპარლამენტო ჯგუფ „მოქალაქეების“ ლიდერს მიაჩნია, რომ მთავრობის მიერ წარმოდგენილ ბიუჯეტში პრიორიტეტები არასწორადაა გადანაწილებული.
„ყველანაირი სცენარისთვის მზად უნდა ვიყოთ და თავდაცვასა და უსაფრთხოებაზე გაცილებით მეტი უნდა იხარჯებოდეს მაშინ, როდესაც ქვეყანაში ომის საფრთხე არსებობს. ,,უბრალოდ აღმაშფოთებელია, თუ როგორ ანაწილებს მთავრობა პრიორიტეტებს. ეს არ არის საომარი მდგომარეობის ბიუჯეტი. თუ გადავხედავთ რა ხდება ჩვენ გარშემო, ყველგან ომია, ყველა ჩვენი მეზობელი იბრძვის, ჩვენს გარშემო ყველაფერი ინგრევა. რატომ გვგონია, რომ ისლანდიის ან ახალი ზელანდიის ტერიტორია ვართ, სადაც 500 წელია ომი არ მომხდარა? ფინანსთა მინისტრის მოადგილემ გუშინ გააკეთა კომენტარი იმასთან დაკავშირებით, შევიდა თუ არა რუსეთში საქართველოდან 22 ტონა ასაფეთქებელი და ამ ასაფეთქებლით აფეთქდა თუ არა რუსეთის ყველაზე სტრატეგიული ობიექტი - ყირიმის ხიდი. ამაზე რომ საუბრობ და მერე იძახი, ჩვენთან სიმშვიდეა და ქვეყნის განვითარება და აყვავება მიდის, ეკონომიკა აღორძინდა და არანაირი პრობლემები არ გვაქვს, ეს არაადეკვატურობაა. ფინანსთა სამინისტროს მიერ წარმოდგენილი ბიუჯეტი არის არაადეკვატურობის მწვერვალი. ახლა თუ რამე გვაქვს გასაძლიერებელი, ესაა თავდაცვის და უსაფრთხოების სისტემა. სომხეთის მომდევნო წლის ბიუჯეტი იქნება მილიარდ ორასი მილიონი დოლარი, ჩვენზე სამჯერ მეტი. აღარაფერს ვამბობ აზერბაიჯანზე, რომელსაც 30 წელზე მეტია რამდენიმე მილიარდიანი სამხედრო ბიუჯეტი აქვს და შედეგიც აქვს. ალიევმა ის განახორციელა, რაზეც ჩვენ ფიქრსაც კი ვერ ვბედავთ სამაჩაბლოსთან და აფხაზეთთან მიმართებაში - ტერიტორიები დაიბრუნა. ყველა სცენარისთვის და ყველანაირი გამოწვევისთვის მზად უნდა ვიყოთ. ძალიან დაუცველია ჩვენი ქვეყანა. სამწუხაროდ, კაცობრიობის აქსიომაა - ჩაგრავენ იმას, ვინც არის სუსტი. რუსეთს რომ სცოდნოდა, რომ უკრაინა ასეთი ძლიერია, თავს არასოდეს დაესხმებოდა. იმისთვის, რომ არ ვიყოთ სუსტები, ფული უნდა დავხარჯოთ სწორად. როცა 6 მილიარდს ხარჯავ ინფრასტრუქტურაზე და თავდაცვაზე მილიარდს, ე.ი. ვერ ხვდები, სად ცხოვრობ. ნუთუ ვერ ხედავენ, რა ხდება ჩვენ გარშემო? ასეთ დროს თავდაცვასა და უსაფრთხოებაზე ფულის დახარჯვა რომ არ გვინდა, ეს რას ნიშნავს? ბატონ კაკაურიძეს შევახსენე ისტორიული ფრაზა, რომ თუ ფულის დახარჯვა გენანება საკუთარ ჯარზე, მოგიწევს სხვისი ჯარის შენახვა და სხვის ჯარზე ფულის დახარჯვა, რაც მე არ მინდა“ _ განაცხადა ალეკო ელისაშვილმა.