სამართალი

ირაკლი შოთაძე პირადად იღებს პასუხისმგებლობას, გამოძიება ობიექტურად წარიმართოს - გიორგი პაპუაშვილი

საკონსტიტუციო სასამართლოს თავმჯდომარისა და მთავარი პროკურორის ერთსაათიანი შეხვედრა დასრულდა.

როგორც შეხვედრის შემდეგ ჟურნალისტებს გიორგი პაპუაშვილმა განუცხადა, საუბარი იყო ნაყოფიერი და ირაკლი შოთაძემ აიღო პასუხისმგებლობა, რომ მოსამართლეებზე შესაძლო ზეწოლის ფაქტების შესახებ გამოძიება იქნება ობიექტური.

,,ჩვენ ღიად ვილაპარაკეთ ამ საკითხებთან დაკავშირებით, რომელიც ეხება გამოძიებას. ასევე იმას, თუ რასთან არის დაკავშირებული ჩვენი ეჭვი და კითხვის ნიშნები გამოძიების ობიექტურობასთან მიმართებაში. მისგან იყო საკმაოდ კონსტრუქციული მიდგომა, რომ ის პირადად იღებს პასუხისმგებლობას გამოძიება ობიექტურად წარიმართოს. მეორე მხრივ, მოსამართლეებმა, რომლებმაც ამ საქმესთან დაკავშირებით გარკვეული ინფორმაცია მიაწოდეს გამოძიებას, მათი ოჯახის წევრების ან ახლობლების მიმართ შურისძიების მხრივ საშიშროება არ იქნება. ჩვენ შევთანხმდით, რომ პირადად გვექნება კონტაქტი. ასევე დავაყენე პრეტენზიები, რაც ჩვენ გვქონდა იმასთან მიმართებაში, რომ ჯერ კიდევ წელიწადნახევრის წინ, როდესაც იყო ზეწოლის ფაქტებზე საუბარი, მივმართეთ შს მინისტრ, ვახტანგ გომელაურს, მთავარ პროკურორ, გიორგი ბადაშვილს და ასევე აჭარის პროკურატურას, თუმცა არანაირი რეაგირება არ ყოფილა“, - განაცხადა პაპუაშვილმა.