პოლიტიკა
ირანის საგარეო უწყება თავიანთ მოქალაქეებს ურჩევს, თავი შეიკავონ საქართველოში ჩამოსვლისგან
ირანის საგარეო საქმეთა სამინისტრო თავიანთ მოქალაქეებს ურჩევს, უარი თქვან საქართველოში გამგზავრებაზე, თუკი ის აუცილებლობას არ წარმოადგენს.
10 დეკემბერს ირანის საგარეო უწყების სპიკერმა ბაჰრამ ქასემიმ განაცხადა, რომ ირანის მოქალაქეები საქართველოში პრობლემებს აწყდებიან.
„განსაკუთრებული ყურადღებით ვაკვირდებით ზოგიერთ პრობლემას, რომლებსაც ირანელები აწყდებიან საქართველოს საჰაერო და სახმელეთო საზღვრის გადაკვეთისას“, - განაცხადა ქასემიმ.
მისივე ინფორმაციით, ბოლო დღეებში ირანში საქართველოს ელჩი დაიბარეს ირანის საგარეო უწყებაში აღნიშნული პრობლემების განსახილველად.
ირანული მედიის ინფორმაციით, ქასემის შენიშვნები უკავშირდება ცნობებს, რომ ირანის რამდენიმე მოქალაქეს აეროპორტში შემოწმებისას უპატივცემულოდ მოექცნენ.
მანამდე, 2 დეკემბერს საქართველოში ირანის საელჩომ დაადასტურა ინფორმაცია ირანის ათობით მოქალაქის საქართველოდან დეპორტაციისა და ქვეყანაში შესვლაზე უარის თქმის შესახებ.
ირანული მედიის ინფორმაციით, თეირანი თბილისთან ურთიერთობების გარკვევას ცდილობდა და კერძოდ, საიმიგრაციო პოლიტიკის ახსნასა და დეპორტაციის მიზეზების მკაფიო განმარტებას მოითხოვდა.