ეკონომიკა

ირმა ინაშვილი - კობა გვენეტაძეს: გეყოთ ვაჟკაცობა და ღიად უთხარით მოსახლეობას, რომ ლარი ავა სამამდე

ან გამოსავალი შემოგვთავაზეთ, ან გეყოთ ვაჟკაცობა, ღიად უთხარით მოსახლეობას, რომ ლარი ავა სამამდე, ან გადადექით და წადით, - ასე მიმართა ფრაქცია ,,საქართველოს პატრიოტების’’ წევრმა, პარლამენტის ვიცე-სპიკერმა ირმა ინაშვილმა ეროვნული ბანკის პრეზიდენტ კობა გვენეტაძეს პარლამენტის პლენარულ სესიაზე.

”ჩვენ მივმართეთ მთავრობას რეკომენდაციით, რომ შეიმუშაოს გეგმა, რათა წლიური საბანკო პროცენტი დაწეული იყოს 3-4%-მდე. დღეს არის კაბალურად დიდი პროცენტი საქართველოში. ჩვენც ვმოგზაურობთ, დავდივართ მსოფლიოში, ვიცით, იქ არსებული საპროცენტო განაკვეთები, ვიცით საბანკო მომსახურეობის არსი და ასეთი მაღალი პროცენტი არსად არ არის. ფიქრობთ თუ არა ამაზე, რომ ამ კრიზისულ სიტუაციაში პროცენტმა დაიწიოს 3-დან 4%-მდე? იმასაც შეგახსენებთ, რომ არაერთ ქვეყანაში ყოფილა გამოყენებული ეს მექანიზმი, მაგალითად, აშშ-ში და საკმაოდ ეფექტური იყო ეს გზა. ყურადღებით ვუსმენ მთავრობის ეკონომიკური გუნდის გამოსვლებს და მეჩვენება კი არა და ვხედავ, რომ სხვა პლანეტაზე იმყოფებით”, - აღნიშნა ინაშვილმა.

,,საქართველოს პატრიოტების’’ წევრმა, ეროვნული ბანკის პრეზიდენტს მოუწოდა, ლარის კურსთან დაკავშირებით შექმნილი ვითარებიდან რეალური გამოსავალი დაასახელოს.

”დღეს თქვენ ვერ გვიყვებით და ვერ გვეუბნებით, რაშია გამოსავალი. საუბრობთ ფინანსურ სტაბილიზაციაზე, მაგრამ საუბრობთ თეორეტიკოსის პოზიციიდან და ჩვენ თეორიები ვერ გვიშველის. თქვენ რომ ფინანსურ სტაბილურობაზე ლაპარაკობთ, ქვეყანა გაქვთ თავზე დანგრეული, ამ ყველაფერზე პასუხისმგებლობა, პირველ რიგში, აქვს ეროვნულ ბანკს და მის პრეზიდენტს. არ მინდა მაღალფარდოვანი სიტყვები და ციფრების ბრახა-ბრუხი, მოკლედ გვითხარით, რაშია გამოსავალი და როგორ დაასტაბილურებთ ლარს მოკლე ხანში? - ან გეყოთ ვაჟკაცობა და ღიად უთხარით მოსახლეობას, რომ ლარი ავა სამამდე, ან გადადექით და წადით”, - მიმართა ირმა ინაშვილმა კობა გვენეტაძეს.

ნინო ექვთიმიშვილი