საზოგადოება

ირმა ინაშვილი საფინანსო კომპანია „საქართველოს“ დაზარალებულ მეანაბრეებს შეხვდა

პარლამენტის თავმჯდომარის მოადგილე, ფრაქცია „საქართველოს პატრიოტების“ წევრი ირმა ინაშვილი საფინანსო კომპანია „საქართველოს“ დაზარალებულ მეანაბრეებს შეხვდა, სადაც არსებულ პრობლემებზე და მათი მოგვარების გზებზე იმსჯელეს.

ირმა ინაშვილი და ფრაქცია „საქართველოს პატრიოტები“ ბიუროს სხდომაზე და პარლამენტის საგაზაფხულო სესიის პირველ პლენარულ სხდომაზე, „პარლამენტის მონაწილეობით სამთავრობო კომისიის შექმნის საკითხს“ დააყენებენ.

„კომისიამ უნდა შეისწავლის რა ურთიერთობას ჰქონდა ადგილი და რა სქემას ჰქონდა ადგილი ეროვნულ ბანკსა და საფინანსო კომპანია „საქართველოს“ შორის“, - განცხადება ამის შესახებ პარლამენტის თავმჯდომარის მოადგილემ, ირმა ინაშვილმა მეანაბრეებთან შეხვედრის დასრულების შემდეგ გააკეთა.

„ჩვენ ვიმოქმედებთ იმისათვის, რომ ეროვნული ბანკის პრეზიდენტი მოწვეული იყოს პარლამენტში და მეანაბრეების მხიდან მიეწოდოს ინფორმაცია და ასევე, დაიწყოს მოკვლევა საკუთარი ინსტიტუტის ფარგლებში, რა ურთიერთობას ჰქონდა ადგილი ეროვნულ ბანკსა და საფინანსო კომპანია „საქართველოს“ შორის. რა თქმა უნდა, აუცილებელია სახელმწიფომ, ხელისუფლებამ იზრუნოს იმისთვის, რომ მოხდეს ამ ზარალის კომპენსაცია“,-აღნიშნა ირმა ინაშვილმა. მისივე თქმით, ზარალის კომპენსაცია შეიძლება სხვადასხვანაირი ფორმებით მოხდეს და მეანაბრეებს ამასთან დაკავშირებით გარკვეული ხედვები აქვთ, თუმცა მანამდე აუცილებელია გამოძიების დაწყება. როგორც პარლამენტის თავმჯდომარის მოადგილემ განაცხადა, ფრაქცია დაზარალებულ მეანაბრეებს იურიდიულ დახმარებასაც უწევს.

„ძალიან მნიშვნელოვანია, რომ საკითხები ქვეყანაში წყდებოდეს არა შიმშილობის გზით, არამედ კონსტრუქციული დიალოგის გზით. არ არის ცუდი, რომ უმრავლესობის წარმომადგენლები შეხვდნენ გუშინ მეანაბრებს და „ქართული ოცნებაც“ დაინტერესდა ამ თემით. რაც მეტი ფრაქცია დაინტერესდება, რაც მეტი მინისტრი, დეპარტამენტის უფროსი თუ არასამთავრობო ორგანიზაცია ჩაერთვება ამ საკითხის გადაწყვეტაში, მით უკეთესი“, - აღნიშნა ირმა ინაშვილმა.