საზოგადოება

ის დისკომფორტი, რაც წვევამდელებს აქვთ, უნდა მოვხსნათ - ირაკლი სესიაშვილი

პარლამენტის თავდაცვისა და უშიშროების კომიტეტის თავმჯდომარე, ირაკლი სესიაშვილი თავდაცვის მინისტრის დღევანდელ განცხადებას გამოეხმაურა, რომელიც წვევამდელების სამხედრო სავალდებულო სამსახურში გაწვევის თემას ეხებოდა.

სესიაშვილი საკითხთან დაკავშირებით სამუშაო ჯგუფის შექმნის ინიციატივით გამოდის.

,,აუცილებელია შეიქმნას გარკვეული სამთავრობო, საპარლამენტო თუ შერწყმული ჯგუფი, რომელიც ამაზე იმუშავებს და საზოგადოებასთან ერთად იმსჯელებს, თუ როგორ უნდა მოვახდინოთ ჩვენ სამხედრო სავალდებულო სამსახურის რეფორმირება, ტრანსფორმირება.

ის დისკომფორტი, რაც წვევამდელებს აქვთ, უნდა მოვხსნათ. მეორე მხრივ, უნდა გავაძლიეროთ ის კომპონენტი, რომელიც გულისხმობს იმას, რომ სამხედრო სავალდებულო სამსახური უფრო მეტად იყოს შერწყმული სამხედრო სარეზერვო სამსახურთან’’, - განუცხადა ჟურნალისტებს სესიაშვილმა.

ცნობისათვის: წვევამდელების გაწვევის გაუქმებასთან დაკავშირებით გადაწყვეტილება თავდაცვის სამინისტროში თინა ხიდაშელის ხელმძღვანელობის დროს მიიღეს. ხიდაშელის შესაბამისი ბრძანების თანახმად, უწყება ოფიციალურად, აღარ გააკეთებს განაცხადს მოთხოვნას წვევამდელების გაწვევაზე.

ნინო ექვთიმიშვილი