საზოგადოება

ისრაელის სახლის ინიციატივით, ისრაელის ქარმელის კოლეჯი ქართულ უნივერსიტეტებთან ითანამშრომლებს

საქართველოს პარლამენტის თავმჯდომარის, ირაკლი კობახიძის ისრაელში ვიზიტისას მიღწეული შეთანხმების საფუძველზე და საქართველო-ისრაელის ბიზნეს პალატისა და „ისრაელის სახლის“ ორგანიზებით, თბილისში ვიზიტით მყოფი ისრაელის დელეგაცია დღეს საქართველოს უნივერსიტეტს ეწვია. სტუმრებს უნივერსიტეტის ხელმძღვანელობამ უმასპინძლა.

ქნესეთში საქართველოსთან მეგობრობის ჯგუფის წევრმა და ისრაელის ქარმელის აკადემიური კოლეჯის პრეზიდენტმა აკრამ ხასონმა საქართველოს უნივერსიტეტის ხელმძღვანელობასთან ერთად ხელი მოაწერა თანამშრომლობის მემორანდუმს, რომელიც სასწავლებლების მიერ ერთობრივი პროექტების შემუშავებას, კვლევით საქმიანობას, სტუდენტებისთვის დისტანციურ სწავლებას და ორმაგი ხარისხის მინიჭებას ითვალისწინებს.

ქარმელის აკადემიური კოლეჯისა და საქართველოს უნივერსიტეტს შორის თანამშრომლობის ინიციატივა „ისრაელის სახლის“ ხელმძღვანელს იციკ მოშეს ეკუთვნის. დაგეგმილია, აგრეთვე, კარმელის კოლეჯის საქმიანი ურთიერთობა სხვა ქართულ უნივერსიტეტებთან, მათ შორის თბილისის სახელმწიფო უნივერსიტეტთან. თანამშრომლობის ერთ-ერთი მიმართულება ქართულ უნივერსიტეტებში ჰოლოკოსტის კურსის სწავლების დაწყების ხელშეწყობა იქნება.

იციკ მოშეს განცხადებით, „ისრაელის სახლის“ აქტიური მუშაობით, 2018 წელს ისრაელ-საქართველოს ურთიერთიერთობებში ერთ-ერთი წამყვანი განათლების თემატიკა იქნება. ამ საკითხზე ისაუბრა ისრაელში ოქტომბერში გამართული ვიზიტისას საქართველოს პარლამენტის თავმჯდომარემ ირაკლი კობახიძემ. ამ ვიზიტისას, პრაქტიკულად, გამოიკვეთა ის პრიორიტეტები, რომელიც, ამავდროულად, „ისრაელის სახლის“ სამუშაო გეგმაცაა. „ქარმელის კოლეჯი ისრაელში ერთ-ერთი ავტორიტეტული სასწავლებელია და, ვფიქრობ, წარმატებული აღმოჩნდება მისი თანამშრომლობა ქართულ უნივერსიტეტებთან“, _ განაცხადა „ისრაელის სახლის“ ხელმძღვანელმა.

როგორც თანამშრომლობის ხელშეკრულებაზე ხელმოწერისას აკრამ ხასონმა განაცხადა, მოხარულია, რომ ქარმელის კოლეჯი ერთ-ერთი პირველი სასწავლებელია ისრაელიდან, რომელიც მჭიდრო თანამთშრომლობას აპირებს ქართულ უნივერსიტეტებთან. „ლაპარაკია ახალი თაობისთვის თანამედროვე განათლების მიცემაზე, ორი ქვეყნის ახალგაზრდებს შორის კონტაქტების დამყარებაზე, რაც ისრაელ-საქართველოს ურთიერთობების კიდევ უფრო გაღრმავებას მოემსახურება“, - აღნიშნა ქარმელის კოლეჯის პრეზიდენტმა.