პოლიტიკა

ის, რომ საქართველოში მოღვაწე ბიზნესმენები უერთდებიან პროექტს Check In Georgia, ბიზნესის ძალიან ბუნებრივი სურვილია - მიხეილ გიორგაძე

საქართველოს კულტურისა და ძეგლთა დაცვის მინისტრი მიხეილ გიორგაძე ნაციონალური მოძრაობის განცხადებას ეხმაურება იმასთან დაკავშირებით, რომ პროექტ Check In Georgia-ს ბიუჯეტი სამი მილიონით იზრდება და სახელმწიფო ბიზნესმენებს აიძულებს, პროექტი დამატებითი თანხებით დააფინანსონ.

„პირველ რიგში, ვისურვებდი, რომ ინფორმაცია კარგად გადამოწმდეს მის გაჟღერებამდე. სრული პასუხისმგებლობით ვაცხადებ, რომ პროექტ „Check In Georgia”- ს ბიუჯეტი, არათუ 3 მილიონით, არამედ არც ერთი თეთრით არ გაზრდილა - უფრო მეტიც, ჯერ სრულად არც არის გამოყოფილი 29 მილიონი. თანხები ეტაპობრივად, საჭიროებისამებრ, გარკვეული ტრანშებით გამოიყოფა; აღნიშნული 3 მილიონი ერთ-ერთი მომდევნო ტრანში იყო, რომელიც თავიდანვე გათვალისწინებული იყო პროექტის ბიუჯეტში. არაერთხელ მითქვამს, რომ გაყიდული ბილეთებიდან და სასპონსორო პაკეტებიდან შემოსული თანხებით, ჩვენ ვაპირებთ მაქსიმალურად შევამციროთ ბიუჯეტზე დაწოლა“, - განაცხადა მიხეილ გიორგაძემ და აღნიშნა, რომ ისეთი მასშტაბური პროექტით კერძო სექტორის დაინტერესება, როგორიც არის „Check In Georgia”, ბუნებრივია.

„ნებისმიერი პროექტის მიმართ, რომელსაც დიდი გამოხმაურება აქვს, როგორც საერთაშორისო ისე შიდა ბაზარზე, ბიზნესს აქვს ძალიან პრაგმატული ინტერესი, ყველას აქვს სურვილი მოხდეს მათი კომპანიის პოზიციონირება ამ პროექტის ფარგლებში. „Check In Georgia” გამონაკლისი არ არის; მან უპრეცედენტო დაინტერესება გამოიწვია, როგორც ქვეყნის შიგნით, ისე საერთაშორისო არენაზე, შესაბამისად, დიახ, საქართველოში მოღვაწე ბიზნესმენები უერთდებიან ამ პროექტს - ეს არის ბიზნესის ძალიან ბუნებრივი სურვილი“, - განაცხადა მიხეილ გიორგაძემ.

მარი ნამგალაძე