უახლესი ამბები
არქივი
საზოგადოება
იცი, თუ არა, როგორ დაიცვა შეზღუდული შესაძლებლობების მქონე პირის უფლება და ქონება?
როდესაც სანოტარო მოქმედებას შეზღუდული შესაძლებლობების მქონე პირი ასრულებს, კანონმდებლობა მისი უფლებისა და ქონების დასაცავად დამატებით მექანიზმებს ითვალისწინებს.
საქართველოს ნოტარიუსთა პალატის ინფორმაციით, თუ უსინათლო პირს სურს რაიმე დოკუმენტის, გარიგების... სანოტარო წესით დამოწმება, მას სანოტარო ბიუროში ორი პირი უნდა ახლდეს. ერთი მის მაგივრად აწერს ხელს დოკუმენტს, მეორე (მოწმე) კი ესწრება სანოტარო მოქმედების შესრულების პროცესს. იგი არ უნდა იყოს სანოტარო აქტის მონაწილე მხარის ნათესავი.
ამასთან, ნოტარიუსი ვალდებულია, უსინათლო პირს სანოტარო აქტის ტექსტი წაუკითხოს და ამის შესახებ სანოტარო აქტშიც აღნიშნოს.
როდესაც სანოტარო მოქმედებას ასრულებს სმენის არმქონე ან შეზღუდული მეტყველების მქონე პირი, რომელმაც წერა-კითხვა იცის, იგი თვითონ კითხულობს სანოტარო აქტის ტექტს, წერილობით ადასტურებს, რომ ეთანხმება მის შინაარს და ხელს აწერს დოკუმენტს.
ასეთ დროს, სავალდებულო არ არის, სანოტარო მოქმედების შესრულების პროცესს სპეციალისტი ან მოწმე ესწრებოდეს. ნოტარიუსი თვითონ წყვეტს მათი დასწრების აუცილებლობას.
თუ სანოტარო მოქმედების მონაწილე სმენის არმქონე ან შეზღუდული მეტყველების მქონე პირმა არ იცის წერა-კითხვა, ამ შემთხვევაში სანოტარო აქტის დამოწმების პროცესს უნდა ესწრებოდეს მოწმე და კიდევ ერთი პირი, რომელსაც შეუძლია, შეზღუდული შესაძლებლობების მქონე პირს აუხსნას სანოტარო აქტის შინაარსი და მის ნაცვლად მოაწეროს ხელი სანოტარო აქტს.
განსხვავებულია პროცედურები ანდერძის დამოწმების შემთხვევაში.
უსინათლო პირის მიერ სანოტარო ბიუროში ანდერძის შედგენის პროცესს სამი მოწმე უნდა ესწრებოდეს.
თუ ანდერძს სმენის არმქონე ან შეზღუდული მეტყველების მქონე პირი ადგენს, აუცილებელია, პროცესს დაესწროს ორი მოწმე და ისეთი პირი, რომელსაც შეუძლია, შეზღუდული შესაძლებლობების მქონე პირს აუხსნას ანდერძის შინაარსი და მის ნაცვლად მოაწეროს ხელი დოკუმენტს.