სამართალი

იუსტიციის უმაღლესი საბჭო უვადოდ გამწესების მსურველ მოსამართლეებს გაესაუბრება

იუსტიციის უმაღლესი საბჭო დღევანდელი სხდომის დასრულების შემდეგ უვადოდ გამწესების მსურველ მოსამართლეებს გაესაუბრება.

საუბარია იმ 7 მოსამართლეზე, რომლებიც თანამდებობაზე 2015 წლის 1 აგვისტოს სამი წლის ვადით დაინიშნენ და ვადა უახლოეს მომავალში ეწურებათ.

ეს მოსამართლეები არიან: ნანა აფციაური, ეკატერინე კულულაშვილი, დავით კურტანიძე, ქეთევან მინაშვილი, თამარ ოქროპირიძე, ანა ჩხეტია, დავით წერეთელი.

იუსტიციის უმაღლესი საბჭოს სხდომა დღეს, 11:00 საათზეა ჩანიშნული.

დღეს საბჭო 10 საკითხს განიხილავს. მათ შორის არის საკითხი, რომლის მიხედვითაც, ამერიკის იუსტიციის დეპარტამენტი ახალი პროგრამის „სასამართლოს მრჩევლის“ პრეზენტაციას გეგმავს. პროგრამის მიზანია სასამართლო სისტემის გაძლიერებაში დახმარება.

დღესვე საბჭოს წევრები გაესაუბრებიან კონკურსის გარეშე, სხვა სასამართლოში დანიშვნის მსურველ მოსამართლეებსაც.

დღის წესრიგის თანახმად, საბჭო იმსჯელებს სტრატეგიისა და მისი სამოქმედო გეგმის შესრულების ექვსთვიანი ანგარიშის ერთწლიანი ანგარიშით ჩანაცვლების შესახებ.