კომენტარი
ივანიშვილმა ბრძანება გასცა, რომ „ევროპული საქართველოსთვის“ ხმების ხელოვნური მომატება მომხდარიყო - ნინო ბურჯანაძე
„დემოკრატიული მოძრაობის“ ლიდერის, ნინო ბურჯანაძის განცხადებით, „ივანიშვილმა ბრძანება გასცა, რომ სხვადასხვა მანიპულაციების შედეგად „ევროპული საქართველოსთვის“ ხმების ხელოვნური მომატება მომხდარიყო“.
ამის შესახებ ნინო ბურჯანაძემ დღეს გამართულ ბრიფინგზე განაცხადა.
„მინდა ერთმნიშვნელოვნად ვთქვა, რომ შედგა ძალიან დიდი გარიგება, სამწუხაროდ, იმ პოლიტიკურ პარტიებს შორის რომლებმაც ბარიერი გადალახეს და „ქართულ ოცნებას“ შორის. ეს პირველ ყოვლისა ეხება „ქართულ ოცნებას“ და ბოკერიას „ნაციონალურ მოძრაობას“.
საჩხერის საარჩევნო უბნებზე მიღებული შედეგების ელემენტარული ანალიზი გვაძლევს იმის საშუალებას, რომ ვთქვათ – ბიძინა ივანიშვილს სურდა მეორე ადგილზე გაეყვანა „ბოკერია-ბაქრაძე-უგულავას ნაციონალური-მოძრაობა“. მოხდა გარიგება ბოკერიასა და ივანიშვილს შორის. უბრალოდ მათ იმდენიც ვერ გააყალბეს, რამდენის სურვილიც ჰქონდათ. კერძოდ, საჩხერის პრაქტიკულად ყველა უბანზე მეორე ადგილზეა „ევროპული საქართველო“. ივანიშვილმა და ბოკერიამ საჩხერე გაინაწილეს. საჩხერე არის ერთადერთი რაიონი მთელს საქართველოში, სადაც ყველა უბანზე მეორე ადგილზე ბოკერიას პარტია გავიდა. ეს არის პირდაპირი გარიგება ბიძინა ივანიშვილსა და „ევროპული საქართველოს“ შორის საქართველოსა და ქართველი ხალხის წინააღმდეგ“,- განაცხადა ნინო ბურჯანაძემ.
მონიკა დავლიანიძე