კომენტარი
ივანიშვილს ქვეყნის პრემიერმინისტრობას კონსტიტუცია უკრძალავს
ბიძინა ივანიშვილს ქვეყნის პრემიერ-მინისტრის პოსტის დაკავებას კონსტიტუცია უკრძალავს. მეორედ მოსვლას ივანიშვილი იმ შემთხვევაში შეძლებს, თუ საფრანგეთის მოქალაქეობაზე უარს იტყვის. კონსტიტუციის 25-ე მუხლის თანახმად, საქართველოს პრეზიდენტის, პრემიერ-მინისტრის ან პარლამენტის თავმჯდომარის თანამდებობა არ შეიძლება ეკავოს საქართველოს მოქალაქეს, რომელიც, იმავდროულად, სხვა სახელმწიფოს მოქალაქეა.
იურისტი ლევან ალაფიშვილი აღნიშნავს, რომ მოქალაქეობის დათმობის გარეშე, ივანიშვილს საკონსტიტუციო ცვლილების გატარება დასჭირდება, რაც ძალიან დიდ პროცედურებთან არის დაკავშირებული.
„კონსტიტუციის ახალი რედაქცია კრძალავს ორმაგი მოქალაქეობის მქონე პირმა დაიკავოს, პრემიერის, პარლამენტის თავმჯდომარის და პრეზიდენტის თანამდებობა. შესაძლებელია ამ კაზუსის გადაწყვეტა მხოლოდ და მხოლოდ ორი გზით: კონსტიტუციური ცვლილებები, რაც ამ შემთხვევაში, დროს რომ თავი დავანებოთ, პროპორციულის ჩაგდებაზე ძნელად მიმაჩნია. მეორე გზა არის, თვითონ ამ პირმა თქვას უარი უცხო ქვეყნის მოქალაქეობაზე. კონსტიტუციურ ცვლილებებს ავქვს თავისი პროცედურა, შემუშავება, საყოველთაო სახალხო განხილვა, შემდეგ უკვე პარლამენტში განხილვა სამი მოსმენით, შესაბამისად, მაღალი კვორუმი, ან სამი მეოთხედი, ან ორი მესამედი. ერთ შემთხვევაში, მას ორი პარლამენტი სჭირდება, მეორე შემთხვევაში სჭირდება ერთი პარლამენტი, მაგრამ მაჟორიტარებს რომ თავი დავანებოთ, ოპოზიციამ არ მგონია, ამას მხარი დაუჭიროს“, - აცხადებს ლევან ალაფიშვილი.
ლევან ალაფიშვილის კომენტარს “ფორმულანიუსი“ ავრცელებს.