საზოგადოება

საქართველოში ფრენის უფლებას უკრაინის მიერ სანქცირებული კიდევ ერთი ავიაკომპანია ითხოვს

საქართველოში ფრენის მოთხოვნით აპლიკაცია კიდევ ერთმა საავიაციო კომპანიამ Iraero-მ დაარეგისტრირა, - ამის შესახებ ინფორმაციას რუსული სამთავრობო გამოცემა ავრცელებს.

რუსულ კომპანიას ფრენა მოსკოვიდან საქართველოს ორ ქალაქში, თბილისსა და ბათუმში სურს.

კომპანიის პრესსამსახურში აცხადებენ, რომ ფედერალური საჰაერო ტრანსპორტის სააგენტოში შეხვედრა 19 მაისს გაიმართება, სადაც გადაწყდება მიეცემა თუ არა კომპანიას ფრენის უფლება.

როგორც სანქცირებული კომპანიებისთვის და სუბიექტებისთვის შექმნილ ვებგვერდზე ვკითხულობთ, Iraero უკრაინის სახელმწიფოს მიერ არის სანქცირებული.

ამავე გვერდის მიხედვით, უკრაინულმა მხარემ კომპანიას სანქციები იმიტომ დაადო, რომ იგი რუსეთის ხელისუფლებისთვის სტრატეგიულად მნიშვნელოვან სექტორებში ოპერირებს. Iraero რუსეთის მთავრობისთვის უზრუნველყოფს მაღალ მატერიალურ მხარდაჭერას იმ სექტორებში, რომელიც ძირს უთხრის და საფრთხეს უქმნის უკრაინის სუვერენიტეტს, ტერიტორიულ ინტეგრაციასა და დამოუკიდებლობას.

კომპანია სხვა ქვეყნების მიერ არ არის სანქცირებული.

აღსანიშნავია, რომ პირველი საავიაციო კომპანია, Azimuth Airlines, რომელსაც ქართულმა მხარემ ფრენის უფლება მისცა ამავე მიზეზებით არის სანქცირებული უკრაინის მიერ.

წყარო:მთავარი არხი