საზოგადოება

კახა ბექაურის ბრალდებები შეუფერებელია დამოუკიდებელი და ნეიტრალური არბიტრისთვი - კოალიცია „მედიის ადვოკატირებისთვის“

კოალიცია „მედიის ადვოკატირებისთვის“ გამოეხმაურა კომუნიკაციების ეროვნული კომისიის თავმჯდომარის, კახა ბექაურის განცხადებას, რომელმაც არასამთავრობო ორგანიზაცია ,,საერთაშორისო გამჭვირვალობა - საქართველო“ მიკერძოებაში დაადანაშაულა.

საქმე ეხება არასამთავრობოს ანგარიშს, რომლის მიხედვით ბექაური კომუნიკაციების ეროვნული კომისიის წევრის / თავმჯდომარის თანამდებობისთვის საჭირო საკვალიფიკაციო მოთხოვნებს ვერ აკმაყოფილებს.

„გამჭვირვალობის“ მიერ გამოქვეყნებულ ინფორმაციას საქართველოს კომუნიკაციების ეროვნულმა კომისიამ 12 დეკემბერს სპეციალური განცხადებით უპასუხა.

კოალიციის შეფასებით, ბექაურმა მისი თანამდებობისთვის შეუფერებელი განცხადება გააკეთა, რადგან ის ვალდებულია იყოს ნეიტრალური და დამოუკიდებელი არბიტრი.

„მივიჩნევთ, რომ კომუნიკაციების ეროვნული კომისიის თავმჯდომარის მიერ დაუსაბუთებელი ბრალდებების წაყენება არასამთავრობო ორგანიზაციის მიერ გავრცელებული ფაქტობრივი ინფორმაციის საპასუხოდ, შეუფერებელია დამოუკიდებელი და ნეიტრალური არბიტრისთვის, რომელსაც უმნიშნელოვანესი სფეროს, მედიისა და კომუნიკაციების რეგულირება აქვს მინდობილი.

ამ შემთხვევაშიც, ისევე როგორც საზოგადოებრივი მაუწყებლის სადავო კანონპროექტის მხარდამჭერი განცხადების შემთხვევაში, საინტერესოა კომისიის მიერ საჯარო განცხადებების მიღების პროცედურა. მიუხედავად განმარტების მოთხოვნისა, კოალიციისთვის დღემდე უცნობია, აღნიშნული განცხადების ავტორი მარეგულირებელი კომისიის თავმჯდომარე იყო, თუ კომისიის ყველა წევრი“, - წერია კოალიციის განცხადებაში.