საზოგადოება

კახა კალაძე აფაქიძისა და თაბუკაშვილის ქუჩების მოსახლეობის პროტესტს ეხმაურება

თბილისის მერი კახა კალაძე აფაქიძის და თაბუკაშვილის ქუჩების მოსახლეობის პროტესტს გამოეხმაურა და აღნიშნა, რომ აფაქიძის ქუჩაზე არანაირი პრობლემა არ არსებობს.

“ჩვენ რამდენჯერმე შევხვდით მოსახლეობას. ამ კონკრეტულ ლოკაციაზე არანაირი პრობლემა არ არსებობს. იქ იყო მათემატიკის ინსტიტუტი, რომელიც ინვესტორმა დაანგრია და იგივე კონტურებში აშენებს ახალ საცხოვრებელ კორპუსს“, - განაცხადა კალაძემ.

თბილისის მერი თაბუკაშვილის ქუჩაზე, კადეტთა ლიცეუმის მცხოვრებთა ნაწილის მოთხოვნასაც გამოეხმაურა, რომლებიც შენობის რეაბილიტაციას აპროტესტებენ. მისი თქმით, ამ ლოკაციაზე მოსახლეობის ნაწილი პროექტის განხორციელებას ეთანხმება, ნაწილი კი წინააღმდეგია.

შეგახსენებთ, რომ აფაქიძის ქუჩის მოსახლეობის ნაწილი კორპუსის მშენებლობასთან დაკავშირებით პროტესტს გამოთქვამს და შიმშილობას იწყებს.

მოსახლეობამ პროტესტის ფორმას ჯერ კიდევ 3 მარტს მიმართა. მაშინ ადგილობრივები აცხადებდნენ, რომ აფაქიძის #11 ნომრის გვერდით მრავალსართულიანი კორპუსის მშენებლობა ქუჩაზე არსებულ ისედაც მძიმე მდგომარეობას უფრო ართულებს, რადგან ახალ კორპუსს მათი საცხოვრებლიდან მხოლოდ 4-5 მეტრი აშორებს. მაშინ ადგილობრივებმა მერიისგან ტერიტორიის გამოსყიდვა და სკვერის მოწყობა მოითხოვეს, წინააღმდეგ შემთხვევაში კი არქიტექტურის სამსახურის წინააღმდეგ სასამართლოში სარჩელის შეტანა დაანონსეს.

ცირა გურგენიძე