საზოგადოება

კახა კალაძე ხანდოს ხეობის მოსახლეობას დღეს შეხვდება

საქართველოს ვიცე-პრემიერისა და ენერგეტიკის მინისტრის კახა კალაძის განცხადებით, ის ხანდოს ხეობის მოსახლეობას დღეს შეხვდება.

„ხანდოს ხეობასთან დაკავშირებით ჩვენ შეთანხმებული ვიყავით და ჩამოგვყავს გერმანული კომპანია, ვინც დააპროექტა კონკრეტული გადამცემი ხაზები. დღეს გვექნება ადგილობრივ მოსახლეობასთან შეხვედრა და ყველა კითხვაზე, რომელიც მათ აწუხებთ, ეს იქნება მისასვლელი გზები თუ გეოლოგიური კვლევები, პასუხები იქნება გაცემული“, - განაცხადა ენერგეტიკის მინისტრმა.

კალაძემ აღნიშნა, რომ ხანდოს ხეობაში მაღალი ძაბვის ელექტროგადამცემი ხაზების მშენებლობა საერთაშორისო სტანდარტებით იქნება გაკეთებული.

შეგახსენებთ, ფასანაურისა და ხანდოს ხეობის მოსახლეობა ქსანი-სტეფანწმინდის მაღალი ძაბვის ელექტროგადამცემი ხაზების მშენებლობას აპროტესტებს. მათი თქმით, ეს ეკოლოგიურ კატასტროფას გამოიწვევს, ასევე გამოსხივება დააზინებს ადგილობრივების ჯანმრთელობას.

ანა მებურიშვილი