საზოგადოება

კანონი მიმართულია მხოლოდ ერთი ადამიანის უსაფრთხო ძილის შენარჩუნებისკენ- აქცია ქუთაისში პარლამენტის შენობასთან

ქუთაისში პარლამენტის შენობასთან, ნაციონალური მოძრაობის წევრები ე.წ მოსმენების კანონის დამტკიცება გააპროტესტეს.

აქციის მონაწილეების თქმით, საპარლამენტო უმრავლესობამ პოლიტიკური გადაწყვეტილება წინასწარ მიიღო და კანონი ძალაში არ უნდა შევიდეს.

როგორც მედიასთან საუბარში ნაციონალური მოძრაობის წევრმა გიგა შუშანიამ განაცხადა, კანონი მიმართულია მხოლოდ ერთი ადამიანის, ბიძინა ივანიშვილის უსაფრთხოების შენარჩუნებისკენ.

„ეს კანონი არც ადამიანის უფლებების დაცვისკენ არის მიმართული და არც ქვეყნის უსაფრთხოების დაცვისაკენ. ეს კანონი მიმართულია ერთი ადამიანის უსაფრთხო ძილისაკენ, რომელსაც ბიძინა ივანიშვილი ჰქვია. ყველა ბერკეტი ეძლევა მისი დაცვის უფროსს, სუს-ის უფროსს გომელაურს, იმისთვის, რომ უზრუნველყოს ამ ქვეყანაში მხოლოდ ერთი ადამიანის უსაფრთხოება მოქალაქეების უფლებების დარღვევის ხარჯზე, მუდმივი თვალთვალის, მიყურადების ხარჯზე. შემდეგ ამ კადრების მონტაჟის ხარჯზე და ეთერში გამოქვეყნების ხარჯზე“,-აღნიშნა შუშანიამ.

საპარლამენტო უმრავლესობამ ე.წ მოსმენების შესახებ კანონი გუშინ პირველი მოსმენით მიიღო. დღეს კი, საკანონდებლო ორგანოში მეორე მოსმენა მიმდინარეობს.

მონიკა დავლიანიძე