ეკონომიკა

კანონპროექტიდან ამოღებული იქნება მუხლი ეროვნული ბანკის საბჭოს წევრისთვის იმუნიტეტის მინიჭების შესახებ - შალვა თადუმაძე

მთავრობის საპარლამენტო მდივნის, შალვა თადუმაძის განცხადებით, მთავრობამ გაითვალისწინა პარლამენტის შენიშვნები „ეროვნული ბანკის შესახებ“ დაგეგმილ ცვლილებებთან დაკავშირებით. გათვალისწინებულია, რომ კანონპროექტიდან ამოღებული იქნება მუხლი ეროვნული ბანკის საბჭოს წევრისთვის იმუნიტეტის მინიჭების შესახებ.

თადუმაძემ აღნიშნა, რომ დარგობრივი ეკონომიკისა და ეკონომიკური პოლიტიკის კომიტეტის 5 შენიშვნიდან მთავრობამ 4 გაიზიარა.

„გავიზიარეთ ეროვნული ბანკის საბჭოს წევრების იმუნიტეტის საკითხთან დაკავშირებული შენიშვნა - აღნიშნული რეგულაცია კანონპროექტში წარმოდგენილი არ იქნება. გარდა ამისა, საუბარი იყო გადამცვლელი ჯიხურების მოსაკრებლის გაზრდაზე. ჩვენ შევთანხმდით და აღნიშნული ცვლილება არ განხორციელდება. ფიზიკური პირის სესხის გაცემის შესაძლებლობაზე ეს შეზღუდვა მოიხსნება და კანონპროექტით აღარ იქნება გათვალისწინებული. კიდევ ერთი საკითხი მიკროსაფინანსო ორგანიზაციების ბიზნესში მონაწილეობის პროცენტულ განაკვეთებს ეხებოდა. ამ მიმართულებითაც ცვლილება არ განხორციელდება. რაც შეეხება საბანკო ჯგუფს, რომელიც აღნიშნული კანონპროექტით შემოდის და ძირითადი სიახლე და პრინციპია, თუ აქამდე ეროვნული ბანკი კერძო ბანკებზე ზედამხედველობას ახორციელდება, ის განახორციელებს ზედამხედველობას საბანკო ჯგუფზე. კანონი განსაზღვრავს, თუ ვინ არის საბანკო ჯგუფი - ყველა ის ფინანსური ინსტიტუტი, რომელიც რაიმე სახით ასოცირდება ბანკის დამფუძნებელთან ან ბანკთან. შესაბამისად, ეროვნული ბანკი ყველა ამ იურიდიულ პირზე განახორციელებს ზედამხედველობას. იყო მოთხოვნა, რომ აღნიშნულში უნდა ყოფილი საინვესტიციო ფონდები, თუმცა ჩვენ ამას არ ვითვალისწინებთ. დანარჩენი ოთხი შენიშვნა გათვალისწინებულია“, - თქვა თადუმაძემ.

შეგახსენებთ, 15 სექტემბერს გაიმართა „ეროვნული ბანკის შესახებ“ დაგეგმილი ცვლილებების განხილვა დარგობრივი ეკონომიკისა და ეკონომიკური პოლიტიკის კომიტეტის სხდომაზე. მუხლი, რომელიც ითვალისწინებდა ეროვნული ბანკის საბჭოს წევრისთვის იმუნიტეტის მინიჭებას, საპარლამენტო უმრავლესობის რამდენიმე წევრმა გააპროტესტა. ინიციატივის თანახმად, ეროვნული ბანკის საბჭოს წევრი ხელშეუხებელი უნდა ყოფილიყო, რის გამოც დაუშვებელი იქნებოდა მისი სისხლის სამართლის პასუხისგებაში მიცემა, დაკავება ან დაპატიმრება, მისი ბინის, მანქანის, სამუშაო ადგილის ან პირადი ჩხრეკა.

ანა მებურიშვილი