უახლესი ამბები
არქივი
მსოფლიო
კატალონია დამოუკიდებლობას რამდნეიმე დღეში გამოაცხადებს - კარლეს პუიჩდემონი
კატალონია დამოუკიდებლობას რამდენიმე დღეში გამოაცხადებს, ამის შესახებ ავტონომიური რეგიონის პრეზიდენტმა კარლეს პუიჩდემონმა ბიბისის უთხრა.
მისივე ინფორმაციით, ადგილობრივი მთავრობა შესაბამის ზომებს „მიმდინარე კვირის ბოლოს ან მომდევნო კვირის დასაწყისში“ მიიღებს.
ბიბისის კითხვაზე, რას მოიმოქმედებს პუიჩდემონი, თუ მადრიდი კონტროლს დაამყარებს კატალონიაზე, მან განაცხადა, რომ ეს „იქნება შეცდომა, რომელიც ყველაფერს შეცვლის“.
მან ინტერვიუში დაადასტურა, რომ მადრიდსა და ბარსელონას შორის ამ დრომდე არ შემდგარა კონტაქტი. ასევე პუიჩდემონი არ დაეთანხმა ევროკომისიის განცხადებას, რომელმაც კატალონიის რეფერენდუმი „არაკონსტიტუციური“ და „ესპანეთის შიდა საქმე“ უწოდა.
პიუჩდემონის ინტერვიუ ესპანეთის მეთაურის ოფიციალურ განცხადებამდე იყო გაკეთებული.
კატალონიის დამოუკიდებლობის რეფერენდუმზე კომენტირებისას ესპანეთის მეფე ფელიპე VI-ემ განაცხადა, რომ კატალონიელმა ლიდერებმა გამოიჩინეს „უპატივცემულობა“ სახელმწიფოს მიმართ.
ესპანეთის მეთაურმა აღნიშნა, რომ კატალონიის მთავრობამ დაარღვია დემოკრატიული პრინციპები და გააფრთხილა კატალონიელები, რომ შედეგები უარყოფით გავლენას იქონიებს როგორც მდიდარი ავტონომიის, ასევე მთლიანად ესპანეთის ეკონომიკაზე.
სატელევიზიო მიმართვაში მეფე ფელიფემ VI-ემ უთხრა მოსახლეობას, რომ ესპანეთს „მძიმე პერიოდი აქვს გადასალახი“.
კატალონიაში რეფერენდუმი კვირას გაიმართა. ამომრჩეველთა 90%-მა მხარი დაუჭირა რეგიონის დამოუკიდებლობას. აქტივობამ 42.3% შეადგინა, ანუ 5,343,358 დარეგისტრირებული ამომრჩევლიდან საარჩევნო უბნებში 2,262,424 ადამიანი გამოცხადდა. ესპანეთის მთავრობამ ზომები მიიღო, რომ ხალხი არ მისულიყო ხმის მისაცემად.
კატალონიის პრეზიდენტმა კარლეს პუიჩდემონმა რეფერებდუმის შედეგებზე კომენტირებისას განაცხადა, რომ „კატალონიის მოქალაქეებმა მოიგეს უფლება გამოაცხადონ დამოუკიდებელი სახელმწიფო რესპუბლიკის სახით“. შედეგებს არ აღიარებს ოფიციალური მადრიდი. ესპანეთის საკონსტიტუციო სასამართლომ რეფერენდუმი უკანონოდ სცნო, ხოლო ქვეყნის პრემიერ-მინისტრმა მარიანო რეხოიმ პლებისციტი „დემოკრატიის დაცინვა“ უწოდა.
გუშინ კატალონიაში პროფკავშირების ორგანიზებით საყოველთაო გაფიცვა დაიწყო. ამ ფორმით კატალონიელებმა რეფერენდუმის დღეს ეროვნული პოლიციისა და სამოქალაქო გვარდიის მიერ გამოჩენილი ძალადობა გააპრიოტესტეს, რომლის შედეგად 900-მდე ადამიანი დაშავდა. ოფიციალური ინფორმაციით, 33 პოლიციელმა დაზიანებები მიიღო.
ანა მებურიშვილი