კოალიცია “ქართული ოცნების” ერთ-ერთი ლიდერი ნოდარ ხადური ხელისუფლებას ქვეყნის სარეზერვო ფონდების გაფლანგვაში ადანაშაულებს. ამის შესახებ მან “მაესტროს” ეთერში განაცხადა.

“ეს არის ზოგადი მიდგომა ხელისუფლების. ნაცვლად იმისა, რომ ისინი თითოეულ თეთრს, ლარს უფრთხილდებოდნენ და ეფექტიანად ხარჯავდნენ, ჩვენ გვაქვს სიტუაცია, როცა ხელისუფლებამ სარეზერვო ფონდები გაფლანგა. აღმოჩნდა, რომ სამწუხაროდ, არანაირი სხვა სახსრები აღარ არის და ამიტომ ბატონმა ბიძინამ მიუხედავად იმისა, რომ ის არ ეთანხმება ამ ჯარიმებს და მათ შესახებ ხელისუფლებასთან სამართლებრივი დავის გაგრძელებას აპირებს, გადაწყვიტა, რომ დახმარების ერთადერთი ლეგალური გზა გამოიყენოს - მთავრობას მისცეს ფული, რათა ადამიანები არ დარჩნენ დახმარების გარეშე”, - განაცხადა ხადურმა.