პოლიტიკა
ხელისუფლებას ვაიძულებთ, რომ პასუხისგებაში მისცეს ჩვენი შვილების მკვლელები, ან სახლში წაბრძანდეს - ზაზა სარალიძე
შვილმოკლული მამები, ზაზა სარალიძე და მალხაზ მაჩალიკაშვილი ხვალ, 15:00 საათზე, პარლამენტის წინ აქციას გამართავენ.
„არანაირი გზით უკან დახევას არ ვაპირებთ, ვიბრძოლებთ მანამდე, ვიდრე სამართლიანობა აღდგენილი არ იქნება“, - აცხადებს ხორავას ქუჩაზე მოკლული დავით სარალიძის მამა, ზაზა სარალიძე.
სარალიძის თქმით, ხვალინდელი აქციით შვილმოკლული მამები ხელისუფლებას კიდევ ერთხელ შეახსენებენ, მათი შვილების მკვლელობაში დამნაშავე პირები დასაჯოს.
„ხვალ არის თემირლან მაჩალიკაშვილის დაბადების დღე, მის პატივსაცემად ვმართავთ დიდ აქციას. ამასთან ერთად, ხელისუფლებას კიდევ შევახსენებთ, რომ იქ ვართ და ყურადღება მოგვაქციონ. სამართალი აუცილებლად აღდგენილი უნდა იყოს. ვნახოთ, რა ნაბიჯებს გადადგამენ. რაღაც საეჭვოა, ამ ხელისუფლებამ რამე ნაბიჯი გადადგას იქიდან გამომდინარე, რომ თემირლან მაჩალიკაშვილის ლიკვიდაცია პირდაპირ ხელისუფლების მხრიდან მოხდა. ასევე, ჩემი შვილის მკვლელებსაც ხელისუფლება აფარებს ხელს.
ეს 3 თვე, რაც გარეთ ვარ გამოსული, არავისთან კონტაქტი არ მაქვს, არავინ არ გვეხმიანება, არავინ არაფერს არ გვეუბნება. ამათ ვაიძულებთ იმას, რომ პასუხისგებაში მისცენ ჩვენი შვილების მკვლელები, ან ვაიძულებთ, რომ სახლში წაბრძანდნენ.
2 დეკემბერს არის დათუჩას წლისთავი. მე არაფერი მაქვს ამასთან დაკავშირებით დაგეგმილი, ხალხი თუ რამეს დაგეგმავს, არ ვიცი“, - განაცხადა სარალიძემ.