საზოგადოება
ხელშეკრულებით არ გვევალება ზარალის ანაზღაურება - „ბავშთა სამყაროს“ აღმასრულებელი დირექტორი
სააქციო საზოგადოება „ბავშთა სამყაროს“ აღმასრულებელი დირექტორის გიორგი მაჭავარიანის განცხადებით, „ბავშთა სამყაროსა“ და მეიჯარეებს შორის დადებულ ხელშეკრულებაში ფორს-მაჟორი შეტანილია, თუმცა ხელშეკრულების ეს ნაწილი მას ზარალის ანაზღაურებას არ ავალდებულებს.
როგორც მაჭავარიანმა „ტვ პირველის“ ეთერში განაცხადა, მიუხედავად ამისა, იგი ყველაფერს გააკეთებს, რათა ხანძრის შედეგად დაზარალებულ ადამიანებს მაქსიმალურად დაეხმაროს.
რაც შეეხება ქონების დაზღვევას, „ბავშთა სამყაროს“ დირექტორი აღნიშნავს, რომ დაზღვევა მხოლოდ მოიჯარეთა ნაწილს ჰქონდა. მისივე თქმით, თვითონ დამწვარი შენობა სადაზღვევო კომპანია „ალდაგშია“ დაზღვეული.
„ ჩვენს ხელშეკრულებაში ფორს-მაჟორი რა თქმა უნდა წერია. თუმცა, ამ შემთხვევაში ჩვენ არ ვართ ვალდებულები, მაგრამ ეს ადამიანები, პირველ რიგში ჩემი მეგობრები არიან, ასე რომ რაც ჩემზე იქნება დამოკიდებული, მაქსიმალურად გვერდში დავუდგები. შენობა „ალდაგში“ არის დაზღვეული. თუ შენობის ფულს „ალდაგი“ გადაიხდის, მერე ჩვენ დავჯდებით და შეძლებიდან გამომდინარე გავითვალისწინებთ ჩვენი ხალხის პრობლემას, იმიტომ რომ, ეს არამარტო მათი პრობლემაა, ეს ჩვენი პრობლემაც არის. მერიას არანაირი გარანტია არ მოუცია, ის არ არის ვალდებული. ეს არის სააქციო საზოგადოება, ჩვენ ვართ წარმოდგენილები ჩვენი პასუხისმგებლობით და რაც კანონიდან გამომდინარე იქნება, ისე ვიმოქმედებეთ. არანაკლები ზარალი ვნახე მეც თვითონაც. „ბავშთა სამყაროს“ აქციონერი ვარ.
ჟურნალისტის მიერ დასმულ კითხვაზე, რომ მეიჯარეები მიიჩნევენ, რომ ხანძარი ხელოვნურად იქნა გაჩენილი, გიორგი მაჭავარიანი პასუხობს, რომ მოვაჭრეების უმრავლესობისგან მსგავსი ეჭვი არ წამოსულა.
„ჩვენი მოვაჭრეების მხრიდან, უმეტესი ნაწილიდან ეს ეჭვი არ წამოსულა. მე მინდა ვთხოვო ყველა იმ მოქალაქეს, რომელიც ნაკლებად არის დაინტერესებული ჩვენი პრობლემით, ეს ეჭვები არ გააჩინონ, იმიტომ რომ ვინც ვნახე, ჩვენი თანამშრომლები, ერთმანეთის მიმართ ერთსულოვნად ვართ განწყობილი და ამ პრობლემას ვუყურებთ ისე, რომ ერთობლივი ძალებით უნდა გადავჭრათ“,-განმარტა „ბავშთა სამყაროს“ დირექტორმა.
მას ასევე მოუწოდა პოლიტიკოსებს მომხდარი ტრაგედიით არ ისარგებლონ და თავისი მიზნებისთვის არ გამოიყენონ.
„დავინახე დღევანდელი პოლიტიკური სახეები და ძალიან ვთხოვ, ჩემი ასაკის ბიჭები არიან და ნუ გამოიყენებენ „ბავშთა სამყაროს“, ასეთ დიდ პრობლემას თავისი პირადი მიზნებისთვის. ნიკა მელიას გამარჯობით ვიცნობ, ალეკო ელისაშვილიც დავინახე, ასევე სხვებიც. თავიანთ საქმეებს მიხედონ და ჩვენს პრობლემას თავი დაანებონ.“,-განაცხადა გიორგი მაჭავარიანმა.
მონიკა დავლიანიძე