საზოგადოება

ხორავას ქუჩაზე მკვლელობის საქმეზე სამხარაულის ბიუროს დასკვნა დიმიტრი ქუმსიშვილის დავალებით გააყალბეს - ელისო კილაძე

„ქრონიკა +“-ის მთავარმა რედაქტორმა ელისო კილაძემ განაცხადა, რომ ეკონომიკის მინისტრმა დიმიტრი ქუმსიშვილმა თავის ახლობელს, სამხარაულის ექსპერტიზის ბიუროს ხელმძღვანელ გოგა თვაუს ხორავას ქუჩაზე მომხდარი მკვლელობის საქმეზე ექსპერტიზის დასკვნის გაყალბება დაავალა. კილაძის განმარტებით, ქუმსიშვილი უშუალოდ ყოფილი მთავარი პროკურორის, ირაკლი შოთაძის წინააღმდეგ მოქმედებდა, რადგან შოთაძე ხელმძღვანელობდა საგამოძიებო ჯგუფს, რომელიც ქუმსიშვილის, პრემიერ-მინისტრისა და რეგიონული განვითარებისა და ინფრასტრუქტურის მინისტრის კორუფციულ სქემებს იძიებს.

„ხორავას ქუჩის ტრაგედიის საქმეში ჩნდება ლევან სამხარაულის ეროვნული ბიუროს დასკვნა, საიდანაც რეალურად დაიწყო მოზარდების მკვლელობის საქმის გაყალბება. ეს ჩემი ინფორმაციით, მოხდა სწორედ ქუმსიშვილის დავალებით, გოგა თვაურის უშუალო მონაწილეობით სამხარაულის ექსპერტიზის ბიუროში.

ქუმსიშვილის ინტერესები ბუნებრივია იყო, რომ რაც შეიძლება ბევრი პრობლემა შექმნოდა ირაკლი შოთაძეს და ეს მოახერხა კიდეც, იმიტომ რომ შოთაძე იყო იმ საგამოძიებო ჯგუფის ხელმძღვანელი, რომელიც მისი, კვირიკაშვილის და ალავიძის კორუფციულ სქემებს იძიებს.

ეს გახლავთ კორუფციული სქემები, ინფრასტრუქტურის სამინისტროში მათ შორის საგზაო დეპარტამენტში და ის პროექტები, რომელშიც მონაწილეობა ჰქონდა ქუმსიშვილს, როგორც ეკონომიკის მინისტრს და ზურაბ ალავიძეს, როგორც ინფრასტრუქტურის მინისტრს. დაახლოებით 1 მილიარდ ლარზეა საუბარი, რის ფარგლებშიც გამოძიება მიდის.

ძალიან მნიშვნელოვანია ახალი მთავარი პროკურორი მოახერხებს თუ არა იმას, რომ ეს თითქმის გამოძიებული საქმეები ბოლომდე მიიყვანოს.

მე მგონია, რომ წინ საკმაოდ სკანდალური ზაფხული გველის არ გამოვრიცხავ რომ პირდაპირ საპატიმრო ღონისძიება იყოს გამოყენებული პირველი ვიცე-პრემიერის მიმართ“, -განაცხადა კილაძემ.