საზოგადოება

ხვალ სომეხთა გენოციდისადმი მიძღვნილი საპროტესტო მსვლელობა და აქცია გაიმართება

23 აპრილს, თბილისში, სომეხთა გენოციდის 103-ე წლისთავს მიძღვნილი საპროტესტო მსვლელობა და აქცია გაიმართება. ჩირაღდნებითა და სანთლებით საპროტესტო მსვლელობა დაიწყება 20:00-ზე, „ვაკის პარკის“ შესასვლელთან და დასრულდება თურქეთის საელჩოსთან (ი. ჭავჭავაძის გამზირი 35), სადაც გაიმართება ხანმოკლე მანიფესტაცია.

საქართველოს სომეხთა სათვისტომოს ინფორმაციით, 24 აპრილს, 14:00-ზე, თბილისში თურქეთის საელჩოსთან საპროტესტო მანიფესტაცია გაიმართება. საპროტესტო აქციის მონაწილეები თურქეთის ხელისუფლებას მიმართავენ აღიაროს 1915-23წწ. ჩადენილი დანაშაული, შეწყვიტოს სომეხი ერის წინააღმდეგ მიმართული გენოციდალური პოლიტიკის წარმოაბა. აქციის მონაწილეები ასევე მოუწოდებენ საქართველოს ხელისუფლებას დაიწყოს სომეხთა გენოციდის ფაქტის აღიარების პროცესი, შეუერთდეს ევროპარლამენტის რეზოლუციას და დაგმოს თურქეთის გენოციდალური პოლიტიკა.

2015 წლის 15 აპრილს ევროპარლამენტმა სომეხთა გენოციდის მე-100 წლისთავთან დაკავშირებული სპეციალური რეზოლუცია მიიღო (2015/2590(RSP)), რომლითაც ევროპის კავშირის ყველა წევრ სახელმწიფოს (მათ შორის ასოციირებულ წევრებს) ეროვნულ პარლამენტს 1915-23წწ. სომეხთა გენოციდის ფაქტის აღიარებასა და დაგმობას მოუწოდებს.

ცნობა: 1915–1923 წლებში ჯერ ოსმალეთის თურქეთის, ხოლო შემდგომში თურქეთის რესპუბლიკის მოერ განხორციელებული სახელმწიფო გეგმის შედეგად, სომეხმა ერმა 2,000,000-ზე მეტი ადამიანი და საკუთარი ტერიტორიის უდიდესი ნაწილი დაკარგა. თურქეთის ხელისუფლების მიერ 1915–1923 წლებში სომეხი ერის წინააღმდეგ ჩადენილი დანაშაული კლასიფიცირდება როგორც გენოციდი -დანაშაული კაცობრიობის წინააღმდეგ. ამაზე მეტყველებს უამრავი დოკუმენტი, მათ შორის იურიდიული ძალის მქონე. ჯერ კიდევ 1915 წლის მაისში დიდმა ბრიტანეთმა, საფრანგეთმა და რუსეთმა ერთობლივი დეკლარაციით გამოვიდნენ, რომლითაც თურქეთში მიმდინარე სომეხი ერის განადგურებას „კაცობრიობისა და ცივილიზაციის წინააღმდეგ ახალ დანაშაულს“ უწოდებდნენ. სომეხი ერის უფლებების აღდგენის საკითხები იყო განხილული 1919 წელს, პარიზის სამშვიდობო კონფერენციაზე. სომეხთა გენოციდის დამამტკიცებელია ასევე 1920 წლის სევრის ხელშეკრულება.

სომეხთა გენოციდის ფაქტი საფუძვლად დაედო 1943წ. რაფაელ ლემკინის მიერ შემუშავებულ და 1948წ. გაეროს გენერალური ასამბლეის მიერ მიღებულ 260 A(III) რეზოლუციას, რომლითაც მიღებულ იქნა „კონვენცია გენოციდის დანაშაულის თავიდან აცილებისა და დასჯის შესახებ“.

დღეისათვის, სომეხი ერის გენოციდი, შესაბამისი რეზოლუციებითა და გადაწყვეტილებებით აღიარებულია მსოფლიოს 20-ზე მეტ წამყვან სახელმწიფოს, ასევე მრავალი საერთაშორისო ორგანიზაციის, მათ შორის ევროპარლამენტის, ევროსაბჭოსა და ევროპის სახალხო პარტიის მიერ. – ნათქვამია საქართველოს სომეხთა სათვისტომოს მიერ გავრცელებულ პრესრელიზში.