მსოფლიო

კიბერუსაფრთხოების ეროვნული ცენტრი მოქალაქეებს ურჩევს, „იანდექს.ტაქსის“ მომსახურებაზე უარი თქვან

ლიეტუვის თავდაცვის სამინისტროს კიბერუსაფრთხოების ეროვნულმა ცენტრმა რუსული კომპანია „იანდექს.ტაქსის“ შემოწმება დაიწყო. უწყებამ ურჩია ლიეტუვის მოქალაქეებს, შემოწმების დასრულებამდე უარი თქვან „იანდექსის“ მომსახურებაზე, რადგან არსებობს საფრთხე, რომ კომპანია უკანონოდ აგროვებს პერსონალურ მონაცემებს.

ლიეტუვაში „იანდექს.ტაქსიმ“ მუშაობა 26 ივლისს დაიწყო. 4 დღის შემდეგ ქვეყნის კიბერუსაფრთხოების ეროვნულმა ცენტრმა განაცხადა, რომ „იანდექსის“ აპლიკაცია ჩამოტვირთვისას ითხოვს კონფიდენციალურ ინფორმაციაზე ხელმისაწვდომობას, კერძოდ, მომხმარებლის კონტაქტების სიას, ასევე მან შეიძლება მოითხოვოს კამერისა თუ მიკროფონის ჩართვა და შემდგომში კიდევ უფრო გაიფართოვოს თავისი შესაძლებლობები. ლიეტუველი ექსპერტების შეშფოთებას ისიც იწვევს, რომ ლიეტუველი მომხმარებლების პერსონალური მონაცემები იქნება შენახული იმ კომპანიის სერვერებზე, რომლის სათაო ოფისი რუსეთში მდებარეობს.

მანამდე, ამავე წელს ლიეტუვის თავდაცვის სამინისტრომ სახელმწიფო უსაფრთხოების საფრთხეების შეფასებისას აღნიშნა, რომ რუსეთის სპეცსამსახურებს აქვთ კანონიერი და ტექნიკური შესაძლებლობები, რათა რუსული ელექტრონული პლატფორმების მეშვეობით შეაღწიონ რუსეთისა და უცხოეთის მოქალაქეების მონაცემებამდე. უწყებამ ასევე ურჩია სახელმწიფო სამსახურის თანამშრომლებს, ასევე სამხედროებსა და თავდაცვითი კომპლექსის სამოქალაქო პერსონალს, არ დააყენონ „იანდექს.ტაქსის“ აპლიკაცია.