უახლესი ამბები
არქივი
საზოგადოება
კიევში ქართველი სტუდენტების წინააღმდეგ სპეცრაზმმა ცრემლსადენი გაზი გამოიყენა
კიევის საერთო საცხოვრებელში, „კავკასიის ევროპული უნივერსიტეტის“ სტუდენტების წინააღმდეგ, დაცვის სამსახურთან მომხდარი შელაპარაკების გამო, უკრაინის სპეცადნიშნულების რაზმმა ხელკეტები და ცრემლსადენი გაზი გამოიყენა.
ინციდენტის შედეგად ექვსი ქართველი სტუდენტი დაშავდა, ერთი კი შედარებით მძიმედ. იგი საავადმყოფოში იქნა გადაყვანილი, თუმცა ჩატარებული სტაციონარული მკურნალობის შემდეგ, კვლავ საერთო საცხოვრებელში დაბრუნდა.
ამის შესახებ მედიანიუსს „კავკასიის ევროპული უნივერსიტეტის“ დირექტორმა ზვიად ფოფხაძემ განუცხადა.
მისი თქმით, სტუდენტებს დაცვის სამსახურთან მოუვიდათ შელაპარაკება, რადგან მისი წარმომადგენლები სტუდენტებისგან ოთახებში შესვლას ითხოვდნენ.
„სტუდენტებს საერთოსაცხოვრებელში დაცვასთან შელაპარაკება მოუვიდათ. ამის შემდეგ სპეცრაზმი იქნა გამოძახებული და სტუდენტები ცემეს. სპეცრაზმის გამოძახების სხვა მიზეზი არ ყოფილა. შელაპარაკება გამოიწვია იმან, რომ დაცვამ მოუწოდა სტუდენტებს „უმოძრაოდ ნუ ხართ დერეფანშიო, ნუ დგახართ აქ, შედით ოთახშიო“. მათ უთხრეს, არ შევალთ ოთახშიო და ხელი გაუწია, იმანაც შემოუბრუნდა და ამან გამოიწვია კონფლიქტი“,-აღნიშნა უნივერსიტეტის დირექტორმა.
მისი თქმით, სპეცადნიშნულების რაზმი ოთახებში შეჭრას აპირებდა, სტუდენტები კი მათთვის ხელის შეშლას ცდილობდნენ.
„სპეცრაზმი რომ მივიდა, ქართველები არიან, ქართველებიო და ფიზიკურად გაუსწორდნენ, უმტრევდნენ დაკეტილ კარებს, რომ შესულიყვნენ მათთან, ბიჭები ეცადნენ რომ შეეკავებინათ სპეცრაზმი და ამის გამო ექვსი ბიჭი დაშავდა. ერთ-ერთი სტუდენტი საავადმყოფოში იქნა გადაყვანილი. დანარჩენებს ზოგს ცხვირი აქვს გატეხილი, ზოგს თვალები ჰქონდათ დალურჯებული. ცრემლსადენი გაზი იქნა გამოყენებული, დუბინკები. საავადმყოფოში გადაყვანილ ბიჭს სტაციონარული მკურნალობა ჩაუტარდა, მერე კი საერთო საცხოვრებელში დაბრუნდა“,-განაცხადა ფოფხაძემ.
მისი თქმით, ადგილზე უკრაინაში საქართველოს კონსული იყო მისული და მდგომარეობას ადგილზე გაეცნო.
მონიკა დავლიანიძე