მსოფლიო

კიევში „РИА Новости-Украина“-ის ხელმძღვანელი დააკავეს

უკრაინის უსაფრთხოების სამსახურის თანამშრომლებმა კიევში „РИА Новости-Украина“-ის ხელმძღვანელი დააკავეს. როგორც უწყების სპიკერმა, ელენა გიტლანსკაიამ ფეისბუკზე დაწერა, დადგინდა, რომ რუსეთი იყენებდა მედიასტრუქტურას უკრაინასთან საინფორმაციო ომში.

„სამართალდამცველებმა დაადგინეს, რომ ქვეყანა-აგრესორი [რუსეთი] მათ [მედიასტრუქტურებს] უკრაინის წინააღმდეგ ჰიბრიდულ საინფორმაციო ომის ფარგლებში იყენებდა. ახლა საგამოძიებო მოქმედებები მიმდინარეობს“, -დაწერა გიტლანსკაიამ და აღნიშნა, რომ მტკიცებულებათა ბაზას საგამოძიებო მოქმედებების დასრულებისთანავე გამოაქვეყნებენ.

მანამდე ცნობილი გახდა, რომ უკრაინის უსაფრთხოების სამსახური ჩხრეკას ატარებდა „РИА Новости“-ის კიევის ოფისში, ასევე დააკავეს ჟურნალისტი კირილ ვიშინსკი.

უკრაინული მედიის ინფორმაციით, უსაფრთხოების სამსახურმა ყირიმის ავტონომიური რესპუბლიკის პროკურატურასთან ერთად გამოაშკარავა რუსეთს დაქვემდებარებული მედიასტრუქტურების ქსელი, რომელიც გამოყენებულია ჰიბრიდულ ომში უკრაინის წინააღმდეგ.