საზოგადოება

კობა გვენეტაძე - „საქართველოს“ გაკოტრებაზე: ეროვნული ბანკის რეგულაციის ქვეშ დღესდღეობით მხოლოდ კომერციული ბანკებია

ეროვნული ბანკის თავმჯდომარის, კობა გვენეტაძის განცხადებით, მიკროსაფინანსო ორგანიზაცია „საქართველოს“ გაკოტრებასთან დაკავშირებით გამოძიება მიმდინარეობს, შესაბამისად, მას არ სურს საკითხზე უფრო მეტი კომენტარის გაკეთება.

ამის შესახებ გვენეტაძემ პარლამენტის პლენარულ სხდომაზე დეპუტატ ლევან გოგიჩაიშვილის კითხვის საპასუხოდ განაცხადა.

გოგიჩაიშვილმა „საქართველოს“ მეანაბრეების პრობლემაზე ისაუბრა და ეროვნული ბანკის თავმჯდომარეს კითხვით მიმართა, რომ შეიძლებოდა თუ არა ეროვნული ბანკის დროული ჩარევით, „საქართველოს“ პრობლემა არ დამდგარიყო.

როგორც კობა გვენეტაძემ განაცხადა, ეროვნული ბანკის რეგულაციის ქვეშ, დღესდღეობით, მხოლოდ კომერციული ბანკები იმყოფებიან.

„ეროვნულ ბანკს ჰქონდა შეხვედრა წარმომადგენლებთან, იმ კრედიტორებთან, რომლებმაც ზარალი განიცადეს. ზოგადად, რაც შეეხება ამ საკითხს, ეროვნული ბანკის რეგულაციის ქვეშ, დღესდღეობით, შემოდიან კომერციული ბანკები. ვფიქრობ, რომ მომავალში შესაძლებელი იქნება საკანონმდებლო ინიციატივებით, რომ არ მოხდეს ასეთი შემთხვევების დაშვება. უნდა მოგახსენოთ ასევე, რომ ეროვნული ბანკი ყოველთვის და ხშირად კომუნიკაციას აკეთებდა ამასთან დაკავშირებით. ჩვენს ვებ-გვერდზე ვიდეოები დევს, სადაც იყო გაფრთხილება იმასთან დაკავშირებით, რომ მაშინ როდესაც შეთავაზებული არის ბაზართან შედარებით ძალიან დიდი პროცენტები, არის ძალიან დიდი რისკები. ვფიქრობ, რომ ეს კომუნიკაცია გარკვეულწილად უნდა მიიღოს ხალხმა და მიაქციოს ყურადღება იმ გადაწყვეტილებებთან დაკავშირებით, რომელსაც იღებენ თავიანთი სახსრების სხვებთან გადანდობასთან დაკავშირებით. ასე რომ, დაველოდოთ გამოძიების შედეგებს“,-აღნიშნა ეროვნული ბანკის პრეზიდენტმა.

მონიკა დავლიანიძე