საზოგადოება

კოხტას მთის ხანძრის ქრობის პროცესში დილიდან ვერტმფრენები ნისლის გამო ვერ ჩაერთო

კახეთში, ართანას ტყეში გაჩენილი ხანძრის ქრობის ოპერაციაში დილიდან ვერტმფრენები უნდა ჩართულიყო, თუმცა ამ დრომდე მათი გამოყენება ნისლისა და ძლიერი დაკვამლიანების გამო ვერ ხერხდება.

მთის ფერდობზე ამ დრომდე ცეცხლის რამდენიმე კერა რჩება. ადგილზე ცოცხალი ძალაა მობილიზებული.რთული რელიეფის გამო მთაზე სამაშველო ტექნიკის შეყვანა ვერ ხერხდება

თუმცა, როგორც მედიას კახეთის გუბერნატორმა ირაკლი ქადაგიშვილმა განუცხადა, ზოგადად, ვითარება კონტროლს ექვემდებარება.

„სამი-ოთხი კერა არის, რომელიც შეიძლება სხვადასხვა ინტენსივობით იქნას განხილული. ვერტმფრენებს ცოტა ხანი მუშაობის შესაძლებლობა არ ენქებათ დაკვამლიანებისა და ნისლის გამო. ნისლი თავსითავად კარგია, ეს ტენიანობას ნიშნავს. ასე რომ ართანის მიმართულებით ჩვენ სტაბილური, აბსოლუტურად კონტროლს დაქვემდებარებული ვითარება გვაქს“,-აღნიშნა ქადაგიშვილმა.

მეოთხე დღეა, კახეთში ტყის ხანძარს ებრძვიან. ამ დროისთვის, ცეცხლი უკიდია ართანაში, კოხტას მთაზე არსებულ ტყეს. ადგილზე მობილიზებულია სახანძრო სამაშველო ჯგუფები, განსდაკუთრებულ დავალებათა დეპარტამენტის და მოხალისეთა მობილური ჯგუფები.

კახეთის გუბერნატორის ირაკლი ქადაგიშვილის განცხადებით, ართანაში წყლის ავზებით მომარაგება მოხერხდა, რაც ხელს შეუწყობს მაშველებს, ხანძრის ლოკალიზებისთვის საჭირო აპარატები ეფექტურად გამოიყენონ.

დილიდან საქართველოს კუთვნილი ვერტმფრენი უკვე გაფრინდა ხანძრის კერების დაზვერვაზე. როგორც კი კვამლი და ნისლი გაიფანტება, ორი ირანული ვერტმფრენი ჩაერთვება სამუშაოებში. ართანის ტყეში სულ სამი ვერტმფრენი იმუშავებს.

ამასთან, მაშველები რჩებიან თუშეთშიც, სადაც ცეცხლი ლოკალიზებულია, თუმცა მხრჩოლავი ადგილების მონიტორინგი ხორციელდება, რათა თავიდან იყოს აცილებული ცეცხლის გაღვივება. ანალოგიური სიტუაციაა სოფელ შილდის ტყეშიც. ირაკლი ქადაგიშვილის თქმით, შილდაში ცეცხლი ხევში ნეშომპალას უკიდია, არის მხრჩოლავი კერები და აქაც მუშაობენ მაშველები.

გუბერნატორის შეფასებით, კრიტიკული ვითარება არცერთ ლოკაციაზე არ არის და ცეცხლის მასშტაბების გაზრდა არ შეინიშნება.

მონიკა დავლიანიძე