საზოგადოება

კომპანია, რომელიც დემონტაჟს ახორციელებდა, წინასწარ იყო გაფრთხილებული, დაეცვა უსაფრთხოების ზომები - დიდუბის გამგებელი

დიდუბის რაიონის გამგებელი ირმა ზავრადაშვილი დიდუბეში საცხოვრებელი სახლის დემონტაჟის შედეგად მუშის გარდაცვალების ფაქტს გამოეხმაურა. მისი თქმით, კომპანია, რომელიც სახლის დემონტაჟს აწარმოებდა, წინასწარ იყო გაფრთხილებული, რომ დაეცვა უსაფრთხოების ზომები.

დიდუბის გამგებლის თქმით, გარდაცვლილი მამაკაცი წალენჯიხიდან იყო.

„კერძო კომპანია, გაფრთხილებული იყო, დაეცვა უსაფრთხოების ზომები. ორშაბათსაც გავაფრთხილეთ, თუმცა გარდაცვლილია ერთი ადამიანი და დაშავდა სამი ადამიანი. გარდაცვლილი წალენჯიხიდან არის. გამოძიება მიმდინარეობს“, - განაცხადა ზავრადაშვილმა.

შეგახსენებთ, დღეს დიდუბეში, წერეთლის ქუჩის 35-37 ნომერში იტალიურ ეზოში ავარიული სახლის დემონტაჟისას კედელი ჩამოიშალა, რასაც ერთ-ერთი მუშა - 32 წლის მამაკაცი ემსხვერპლა. ის ნანგრევებიდან ამოყვანის შემდეგ უგონო მდგომარეობაში იმყოფებოდა, ექიმებმა მისი გადარჩენა ვეღარ შეძლეს. კიდევ სამი დაშავებული მუშა საავადმყოფოში არიან გადაყვანილი.

შინაგან საქმეთა სამინისტრომ მომხდარზე გამოძიება დაიწყო სისხლის სამართლის კოდექსის 240-ე მუხლის მეორე ნაწილით, რომელიც გულისხმობს სამშენებლო ან სხვა სამუშაოს წარმოებისას უსაფრთხოების წესის დარღვევას, რამაც გამოიწვია ადამიანის სიცოცხლის მოსპობა ან სხვა მძიმე შედეგი.

ანა მებურიშვილი