საზოგადოება

კომპანია, რომელიც საბავშვო ბაღების კვებით მომსახურებას უზრუნველყოფდა თბილისის მერიას ზეწოლაში ადანაშაულებს

კომპანია „ელფი“, რომელიც საბავშვო ბაღების კვებით მომსახურებას უზრუნველყოფდა თბილისის მერიას ზეწოლაში ადანაშაულებს.

კომპანია „ელფის“ დამფუძნებლის თინათინ პაპუაშვილის ინფორმაციით, 42-მილიონიანი ტენდერის გამართვამდე რამდენიმე საათით ადრე მისი კომპანია უკანონოდ დააყადაღეს.

კომპანიის ადვოკატი, შალვა ხაჭაპურიძე მომხდარში მერიის მონიტორინგისა და აუდიტის სამსახურის უფროსს, ბადრი გიორგაძეს ადანაშაულებს.

ხაჭაპურიძის თქმით, ბადრი გიორგაძემ ყოველგვარი აღწერისა და საბუთის გარეშე მოითხოვა კომპანიის დაყადაღება და ტენდერიდან ჩამოშორება.

ბრალდებას თბილისის ვიცე-მერი ირაკლი ხმალაძე გამოეხმაურა.

მისი განმარტებით, ტენდერი კანონის სრული დაცვით მიმდინარებს და თუ რაიმე სახის დარღვევას აქვს ადგილი ამას გამოძიება დაადგენს.

ცნობისათვის, თბილისის მასშტაბით საჯარო ბაგა-ბაღებში ზამთრის არდადეგები 2017 წლის 25 დეკემბერიდან 15 იანვრამდე გაგრძელდება.

ხანგრძლივი არდადეგების ერთ-ერთი მიზეზად ბავშვების კვებით მომსახურებასთან დაკავშირებული პრობლემები დასახელდა. იმ კომპანიასთან, რომელიც აღსაზრდელების კვებაზე ზრუნავს, ხელშეკრულება თბილისის მერიას 22 დეკემბრის ჩათვლით აქვს გაფორმებული. ახალი ტენდერი კი 13 დეკემბერს გამოცხადდა.