კომენტარი

„კონკრეტულ საქმესთან დაკავშირებით საუბარს აზრი არ აქვს“ - ნიკა მელიას პროკურატურაში ბრალდება ოფიციალურად წარუდგინეს

„კოალიცია ცვლილებისთვის“ ერთ-ერთი ლიდერს, ნიკა მელიას საქართველოს პარლამენტის დროებითი საგამოძიებო კომისიის მოთხოვნის შეუსრულებლობაზე ბრალდება ოფიციალურად წაუყენეს.

ნიკა მელიას თქმით, „კონკრეტულ საქმესთან დაკავშირებით საუბარს აზრი არ აქვს. ბოლო წლების განმავლობაში ე.წ. ხელისუფლება რასაც ჩადის, ყველაფერი არის უკანონო“.

„რეპრესიული ნაბიჯების გადადგმის ინტენსივობა რაც უფრო გაიზრდება ივანიშვილის მხრიდან, მით უფრო ახლოს იქნება ქართველი ხალხი ცვლილებებთან და არა უბრალოდ გამარჯვებასთან და ივანიშვილის დამარცხებასთან. ეს ძალიან მნიშვნელოვანია, მაგრამ უფრო მნიშვნელოვანია ცვლილებები უკეთესობისკენ, რაც გარდაუვალია. კონკრეტულ საქმესთან დაკავშირებით საუბარს აზრი არ აქვს. ბოლო წლების განმავლობაში ე.წ. ხელისუფლება რასაც ჩადის, ყველაფერი არის უკანონო. ყველა იმ ადამიანის, რომელიც ჩაერთო ამ რეჟიმის წინააღმდეგ მშვიდობიან ბრძოლაში, გზები გადის დროდადრო ე.წ. პროკურატურაზე, ე.წ. სასამართლოზე, ციხის საკნებზე. მჯერა, რომ საზოგადოება გაიმარჯვებს ივანიშვილის წინააღმდეგ ბრძოლაში. შეუძლებელია, მილიარდერმა ადამიანმა, რაც არ უნდა მხარდაჭერით იყოს წარმოდგენილი მტრულად განწყობილი სახელმწიფოსი, აჯობოს ქართველ ხალხს, ვინაიდან ჩვენთვის დამოუკიდებლობა, სუვერენიტეტი და თავისუფლება არის უმნიშვნელოვანესი ცხოვრებაში. ამის გარეშე ცხოვრება არ შეგვიძლია.

ჩვენ ვიცით, რომ რეჟიმს არ შეუძლია რეპრესიების გარეშე ცხოვრება, მაგრამ მალე მოუწევთ, შეეგუონ ამ ქვეყანაში დემოკრატიულ მმართველობას და არა – ავტოკრატიულ მმართველობას. ივანიშვილი ღელავს, რადგან მისთვის საფრთხე არის ჰიბრიდული ავტოკრატიული რეჟიმი, ანუ ნახევრად დემოკრატიული წყობილება. სრულად ავტოკრატიული რეჟიმი თუ გინდა დაამყარო, მაშინ შენ ძალიან თხელ ყინულზე უნდა გაიარო, რომელიც აუცილებლად ჩატყდება. ამ დილემის წინაშე დგას ივანიშვილი. დარწმუნებული ვარ, უახლოეს მომავალში გადაწყდება ამ სახელმწიფოს მომდევნო 10-15 წლის ბედი“, – განაცხადა ნიკა მელიამ.

ცნობისთვის, ნიკა მელია საქართველოს პარლამენტის დროებითი საგამოძიებო კომისიის სხდომაზე ახსნა-განმარტებისთვის დაიბარეს, სადაც ის არ მივიდა.

აღნიშნული ქმედება სისხლის სამართლის კოდექსის 349-ე მუხლით გათვალისწინებულ დანაშაულად ითვლება, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.

ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.